Tramp: “Afrikada 30 illik münaqişəyə son qoyuruq”
ABŞ prezidenti Donald Tramp bildirib ki, onun administrasiyası Afrika ölkələri olan Konqo Demokratik Respublikası və Ruanda arasında uzun müddətdir davam edən münaqişəyə son qoyacaq sülh sazişinin hazırlanmasında son mərhələyə çatıb.
Crossmedia.az ABŞ mətbuatına istinadən xəbər verir ki, bu açıqlamanı Tramp çərşənbə günü Ağ Evdə Cənubi Afrika Respublikasının prezidenti Siril Ramafosa ilə görüşü zamanı verib.
Prezidentin sözlərinə görə, ABŞ Dövlət Departamentinin Afrika üzrə baş müşaviri və eyni zamanda Trampın kürəkəni olan Massad Boulos iki ölkə arasında danışıqlara rəhbərlik edib. Boulos Oval ofisdəki görüşdə iştirak edərək bildirib ki, həm Ruanda, həm də Konqo tərəfindən təqdim olunan sülh sazişi layihələri Tramp administrasiyası tərəfindən birləşdirilərək yekun sənəd hazırlanıb və hazırda son razılaşma mərhələsindədir.
Konqo ilə onun şərq qonşusu olan Ruanda arasında gərginlik artıq otuz ilə yaxındır davam edir. Ən son qarşıdurma 2021-ci ilin sonlarında, Ruandanın dəstəklədiyi M23 qiyamçı qruplaşmasının Konqoya müdaxiləsi ilə alovlanıb.
Fevral ayında verdiyi müsahibədə Konqo prezidenti Feliks Çisekedi ABŞ və Avropaya ölkəsinin zəngin təbii sərvətlərinə çıxış təklif edərək, Ruandanın Konqonun şərqindən çıxarılması üçün dəstək istəmişdi. Massad Boulos ötən ay Konqoya səfər edib və bu səfərin ardınca hər iki ölkə sənəd imzalayaraq sülhə nail olmaq və ABŞ investoru ilə, xüsusən mədən və infrastruktur sahəsində əməkdaşlığa hazır olduqlarını bildirib.
Mədinə Cəlilova
11:23 22.05.2025
Oxunuş sayı: 871
