Almaniyada daxili terrorla bağlı reyddə beş yeniyetmə saxlanılıb
Almaniyada federal prokurorluq tərəfindən aparılan xüsusi əməliyyat zamanı sığınacaq axtaranların yerləşdiyi binalara hücumlar təşkil etməkdə ittiham olunan beş yeniyetmə saxlanılıb. Onların radikal sağçı “Son Müdafiə Dalğası” adlı neonasist qrupun üzvləri olduğu bildirilir.
Crossmedia.az xəbər verir ki, prokurorların məlumatına görə, qrup 2023-cü ildə yaradılıb və bir neçə yanğın hadisəsinin təşkilatçısı olub. Hücumlar əsasən sığınacaq axtaran şəxslərin yaşadığı obyektlərə yönəlib.
Çərşənbə günü səhər saatlarında Almaniyanın şərq və mərkəzi bölgələrində yerləşən üç federal əyalətdə keçirilən reyd zamanı yaşı 14-dən 18-ə qədər olan beş kişi saxlanılıb. Onlardan üçü qrupun rəhbər heyətində yer alır. Daha əvvəl isə təşkilatın üç üzvü artıq həbs olunmuşdu.
Saxlanılan şəxslərdən ikisinə qarşı qəsdən adam öldürməyə cəhd və qəsdən yanğın törətmək ittihamları irəli sürülüb. Digərləri isə daxili terror təşkilatında iştirak və ona dəstək verməkdə şübhəli bilinir.
Rəsmi qurumlar xəbərdarlıq ediblər ki, radikal sağçı ekstremist qruplar Almaniyada getdikcə daha çox gənci cəlb etməyə başlayıb və bu təhlükəli tendensiyadır.
Mədinə Cəlilova
10:55 22.05.2025
Oxunuş sayı: 8827
