Türk Ordusu Avropanın yeni qalxanı kimi qiymətləndirilir
Ukrayna müharibəsində Rusiyanın üstünlüyü ilə sülhg ehtimalları gündəmə gəldiyi bir vaxtda, Avropa İttifaqı ölkələrində “Rus intiqamı” qorxusu güclənir. Xüsusilə də son üç ildə Ukraynaya verdikləri dəstəyə görə Moskvanın Avropanın şərq sərhədlərinə yönələcəyindən ehtiyat edən Aİ dövlətləri, təhlükəsizlik məsələsində yeni tərəfdaşlara üz tutur.
Crossmedia.az xəbər verir ki, bu barədə Haber Global məlumat yayıb.
Belə ki, Qərb mediasında Türkiyə Silahlı Qüvvələrinin (TSK) NATO daxilindəki gücü və müasir silah sistemləri ilə Avropanın təhlükəsizliyi üçün mühüm bir müttəfiqə çevrildiyi bildirilir.
Türkiyə diqqət mərkəzində
Uzun illərdir Aİ-yə üzv qəbul edilməyən Türkiyə güclənən ordusu və hərbi sənayesi ilə yenidən diqqətləri üzərinə çəkib. NATO-nun ən güclü ordularından biri hesab edilən TSK-nın müasir quruluşu və döyüş qabiliyyəti Qərb mətbuatında tez-tez vurğulanır. Avropa ölkələrinin Türkiyəsiz təhlükəsizliyinin mümkün olmadığı, xüsusilə də hərbi sənaye baxımından bu əməkdaşlığın zəruri olduğu bildirilir.
TB3-ə təriflər
Məlumata görə, Türkiyənin TCG Anadolu hərbi gəmisindən havaya qalxaraq uğurla eniş edən TB3 tipli pilotsuz döyüş aparatını hərbi sahədə bir ilk kimi qiymətləndirib. Bu hadisə Osmanlı imperiyasının 16-cı əsrdə Barbaros Hayreddin Paşanın rəhbərliyi ilə Aralıq və Qara dənizlərdəki gücünü xatırladan tarixi dönüş kimi təqdim edilib.
“Türkiyəsiz Avropa müdafiəsi mümkün deyil”
“Financial Times”-da yayımlanan şərhdə Türkiyənin strateji əhəmiyyətinin artdığı vurğulanıb. NATO üzvü olan Türkiyənin ordusunun “doğru yolda” olduğu qeyd edilərək, “Avropanın cənub-şərqini Rus təhdidindən qorumaq üçün yaxşı silahlanmış müttəfiqə ehtiyac var” deyilir. Prezident Rəcəb Tayyib Ərdoğanın "Artıq Avropa təhlükəsizliyi Türkiyə olmadan, xüsusilə də hərbi sənayemiz olmadan təsəvvür edilə bilməz" sözləri qeyd olunub.
Məlumatda yazılıb ki, NATO-nun yeni baş katibi Mark Rutte də Ərdoğanı “NATO daxilində inanılmaz lider” olaraq dəyərləndirib və onun digər liderlər tərəfindən hörmətlə qarşılandığını deyib.
İsrail narahatdır
Bildirilib ki, Türkiyənin artan regional roluna diqqət çəkərək, ABŞ-nin Suriya sanksiyalarını yumşaltması fonunda İsrailin narahatlığını qeyd edib. Məqalədə, İsrail Baş naziri Benyamin Netanyahu üçün bu vəziyyətin “rahat olmadığını” bildirən şərhlər yer alıb.
“The New York Times” isə, Türkiyənin həm Ukraynaya dəstək verdiyini, həm də Rusiyaya qarşı sanksiyaları tətbiq etmədiyini qeyd edərək bu siyasəti “ağıllı bir tərəfsizlik” kimi qiymətləndirib. Həmçinin İstanbulda Ukrayna, Rusiya və ABŞ liderlərinin iştirakı ilə mümkün üçtərəfli görüş ehtimalı da müzakirə edilib.
Qeyd edək ki, Türkiyə xarici işlər naziri Hakan Fidanın Aİ müdafiə toplantılarına dəvət olunması, Avropa ilə artan hərbi-siyasi əməkdaşlığın göstəricisi kimi təqdim edilib.
Fatimə Məmmədova
23:45 21.05.2025
Oxunuş sayı: 10663
