Baydenin prostat xərçəngi ilə bağlı suallar artır
ABŞ-nın keçmiş Prezidenti Co Baydenin prostat xərçəngi diaqnozundan sonra onun sağlamlıq vəziyyəti və xəstəliyin necə bu qədər irəlilədiyi ilə bağlı bir çox suallar yaranıb. Məlum olub ki, Baydenin məlum olan son prostat-spesifik antigen (PSA) testi 2014-cü ildə aparılıb.
Crossmedia.az xarici mediaya istinadən bildirir ki, Baydenin nümayəndəsi açıqlamasında bildirib: “Prezident Baydenin son məlum PSA testi 2014-cü ildə olub. Cümə günündən əvvəl Baydendə heç vaxt prostat xərçəngi diaqnozu qoyulmamışdı.” PSA testi əsasən prostat vəzi xərçənginin müəyyən olunmasında istifadə olunan qan testidir. Mayo Klinikasının məlumatına görə, bu test qan daxilində prostat-spesifik antigenin miqdarını ölçür.
PSA həm sağlam, həm də xərçəngli prostat toxumaları tərəfindən istehsal olunan zülaldır və əsasən spermanın tərkibində olur. PSA testinin yüksək nəticəsi prostat xərçəngi ehtimalını göstərə bilər, lakin bu artım bəzən prostatın böyüməsi və ya iltihabı ilə də əlaqəli ola bilər. Bu səbəbdən PSA səviyyəsinin düzgün təhlili müəyyən çətinliklər yarada bilər.
Baydenin xərçəngi “hormona həssas” kimi xarakterizə olunub, bu isə onun hormonal terapiyaya daha yaxşı cavab verə biləcəyini göstərir. Lakin Gleason şkalası üzrə 9 bal (5-ci qrup) ilə qiymətləndirilməsi, xəstəliyin yüksək dərəcəli olduğunu göstərir və xərçəngin sümüyə metastaz verdiyi bildirilib.
Bu vəziyyət Baydenin niyə bu qədər fiziki müayinədən keçməsinə baxmayaraq xəstəliyin erkən aşkar olunmadığı sualını gündəmə gətirib. Eks-prezident Donald Tramp məsələ ilə bağlı açıqlamasında bildirib: “Cəmiyyətə bəzi məlumatlar çatdırılmayıb. Bu, artıq təkcə siyasi məsələ deyil, ölkə üçün təhlükəlidir. Kimsə həkimindən açıqlama tələb etməlidir.”
Fatimə Nəbiyeva
17:30 21.05.2025
Oxunuş sayı: 8655
