BMT: Qəzzaya yardım daxil olsa da, hələ fələstinlilərə çatmayıb
BMT bildirib ki, İsrailin humanitar yardıma yeni təhlükəsizlik qaydaları səbəbindən Qəzzaya daxil olan yardım ehtiyacı olan insanlara çatdırıla bilmir.
Qurumun sözçüsü Stefan Dujarrik deyib ki, Qəzza zolağına təchizat daxil olsa da, onların BMT anbarlarına və çatdırılma məntəqələrinə çatması təmin olunmayıb. Dujarrik bu prosesi “uzun, mürəkkəb və təhlükəli” adlandırıb.
Crossmedia.az xarici mediaya istinadən bildirir ki, yardımın paylanmasına İsrail ordusunun yük maşınlarının boşaldılması və yenidən yüklənməsi ilə bağlı tələbləri də mane olur. COGAT bu prosedurlarla bağlı açıqlama verməyib.
İsrailin üç ay əvvəl bölgəyə blokada qoymasından sonra Qəzzada humanitar vəziyyət ağırlaşıb. Hazırda əhalinin böyük hissəsi qida və tibbi ləvazimat çatışmazlığı ilə üz-üzədir. BMT humanitar təşkilatı bildirib ki, ilk yardım maşınları 11 həftəlik fasilədən sonra Qəzzaya daxil olub və bu maşınlarda əsasən uşaq qidaları olub.
İsrailin Xarici İşlər Nazirliyi hər gün onlarla yardım maşınının Qəzzaya girişinin gözlənildiyini bildirib. Lakin əvvəlki atəşkəs dövründə bu rəqəm gündə 600 maşına qədər idi. İsrail baş naziri Benyamin Netanyahu beynəlxalq təzyiqlər fonunda məhdud yardıma icazə verildiyini təsdiqləyib.
BMT və insan haqları təşkilatları İsrailin blokada siyasətini kollektiv cəza kimi qiymətləndirərək, onu müharibə cinayətində ittiham ediblər.
Zəhra Ağayeva
15:15 21.05.2025
Oxunuş sayı: 9432
