Suriya İsrailə məşhur Mossad casusunun arxivini qaytardı
Suriya 1960-cı illərdə İsrailin xeyrinə casusluq edən Eli Koenin arxiv materiallarını İsrail tərəfinə təhvil verib. Qaytarılan sənədlər arasında Koenin vəsiyyətnaməsinin orijinal nüsxəsi, dindirilmə protokolları və ona məxsus şəxsi əşyalar da yer alıb.
Crossmedia.az xarici mediaya istinadən bildirir ki, Suriyanın bu sənədləri İsrailə geri verildiyi barədə məlumat təsdiqləyib. Onların sözlərinə görə, bu addım rəmzi “yaxşı niyyət jesti” kimi qiymətləndirilir və iki ölkə arasında gizli diplomatik prosesin bir hissəsidir.
Eli Koen İsrailin xüsusi xidməti Mossad tərəfindən Suriyaya göndərilmiş və orada yüksək vəzifəli şəxslərlə yaxın münasibətlər qurmuşdu. O, Suriyanın hərbi və siyasi planları barədə mühüm məlumatları İsrailə ötürmüş, 1965-ci ildə ifşa edilərək edam olunmuşdu.
Məlumata görə, sənədlərin qaytarılması Suriyanın hazırkı prezidenti Əhməd aş-Şaranın razılığı ilə baş tutub. Bu prosesə Birləşmiş Ərəb Əmirlikləri vasitəçilik edib və danışıqlar diplomatik kanallar vasitəsilə aparılıb.
Bu hadisə, tərəflər arasında rəsmi münasibətlər olmasa da, dialoq imkanlarının hələ də mövcud olduğunu göstərir. Ekspertlər bunu uzunmüddətli qarşıdurmadan sonra ehtiyatlı diplomatik yaxınlaşmanın siqnalı kimi qiymətləndirirlər.
Fatimə Nəbiyeva
13:30 21.05.2025
Oxunuş sayı: 1014
