Britaniya da İsraildən üz döndərdi
Böyük Britaniya hökuməti İsraillə yeni azad ticarət sazişi üzrə danışıqları dayandırıb.
Crossmedia.az xəbər verir ki, bu barədə Britaniyanın xarici işlər naziri Devid Lammi parlament qarşısında çıxışı zamanı məlumat verib.
Nazir bildirib ki, qərar İsrailin Qəzza zolağında hərbi əməliyyatlarını intensivləşdirməsi ilə bağlı qəbul edilib. Onun sözlərinə görə, bu addım iki ölkə arasında münasibətlərin təməlini təşkil edən prinsiplərə ziddir və Britaniya ictimaiyyətinin dəyərlərinə təhqir kimi qiymətləndirilir.
“Biz pisləşən vəziyyəti seyr edə bilmərik. Netanyahu hökumətinin hərəkətləri danışıqları dayandırmağımızı zəruri edib”, – deyə Lammi vurğulayıb.
D.Lammi həmçinin İsrailin Londondakı səfirinin Xarici İşlər Nazirliyinə çağırıldığını və qərarın ona rəsmi şəkildə çatdırılacağını bildirib.
“Biz İsrail xalqı ilə ortaq dəyərlərə əsaslanan möhkəm dostluq istəyirik. Xalqlarımız və cəmiyyətlərimiz arasında əlaqələrin güclənməsini görmək istəyirik. İsrailin təhlükəsizliyini və gələcəyini, eləcə də İrandan gələn real təhlükə, terror və antisemitizmə qarşı mübarizədə dəstəyimizi davam etdirəcəyik”, – deyə nazir əlavə edib.
Lammiyə görə, Qəzza zolağındakı humanitar vəziyyətin ağırlaşması və yardımın çatdırılmasına maneələr səbəbindən Böyük Britaniya əlavə tədbirlər görməyə hazırlaşır.
Aybəniz Səfərova
20:58 20.05.2025
Oxunuş sayı: 611
