Tramp İsrailə xəbərdarlıq etdi: Müharibə dayanmasa, ABŞ dəstəyi kəsilə bilər
ABŞ prezidenti Donald Tramp İsrailə qarşı sərt mövqe sərgiləyərək, hazırkı müharibə dayandırılmadığı halda ABŞ-ın dəstəyinin dayandırılacağını bəyan edib.
Crossmedia.az xarici mediaya istinadən bildirir ki, Tramp İsrailin baş naziri Benyamin Netanyahunu müharibəni dərhal dayandırmağa çağırıb. Onun sözlərinə görə, davam edən hərbi əməliyyatlar təkcə regionda deyil, beynəlxalq münasibətlər sistemində də ciddi gərginliyə səbəb olur və ABŞ-ın maraqlarına zərbə vurur. Tramp qeyd edib ki, əgər vəziyyət dəyişməzsə, Vaşinqton Tel-Əvivə verdiyi dəstəyi geri çəkəcək.
Trampın bu çıxışı ABŞ-İsrail münasibətlərində nadir hallarda rast gəlinən sərt tənqid kimi qiymətləndirilir. Siyasi analitiklər hesab edirlər ki, prezidentin bu bəyanatı həm Yaxın Şərqdəki vəziyyətə, həm də ABŞ daxilində ictimai rəyə yönəlmiş addımdır. Tramp bu yolla həm xarici siyasətdə fərqli yanaşma nümayiş etdirməyə, həm də seçki öncəsi daha geniş dəstək qazanmağa çalışır.
Ekspertlərin fikrincə, Trampın bu bəyanatı beynəlxalq ictimaiyyətdə də diqqətlə izlənilir. Onlar hesab edirlər ki, ABŞ-ın dəstəyindən məhrum qalmaq İsrail üçün ciddi siyasi və hərbi çətinliklər yarada bilər. Münaqişənin davam etməsi isə bölgədə humanitar böhranın daha da dərinləşməsinə yol açır.
Fatimə Nəbiyeva
16:30 20.05.2025
Oxunuş sayı: 454
