Aİ-nin Xarici Fəaliyyət Xidməti 10 xarici missiyanı ixtisar edəcək, 100-ə yaxın əməkdaş işdən çıxarılacaq
Avropa İttifaqının Xarici Fəaliyyət Xidməti (EEAS) 10-a yaxın xarici missiyanı ixtisar edəcək və təxminən 100 əməkdaşı işdən çıxaracaq.
Crossmedia.az xəbər verir ki, bu barədə Politico nəşri məlumat yayıb.
Məlumata görə, EEAS-ın rəhbəri Kaja Kallas qurumun fəaliyyətinin yenidən təşkili planını təqdim edib. Bu addım Aİ-nin əsas təsisatlarında daha genişmiqyaslı büdcə optimallaşdırmasının bir hissəsidir.
Qeyd edək ki, adının açıqlanmasını istəməyən bir rəsminin sözlərinə görə, ixtisarlar Avropa İttifaqının “artıq ciddi maraq göstərmədiyi” ölkələri, o cümlədən Belarus və Lesotunu əhatə edəcək. İki anonim mənbə Politico-ya bildirib ki, Avropa Xarici Fəaliyyət Xidməti 144 xarici nümayəndəliyindən heç birini rəsmi olaraq bağlamağı planlaşdırmır. Bununla belə, təxminən on nümayəndəlik səfir və onun köməkçiləri kimi əsas heyətdən məhrum olacaq. Bundan əlavə, yerli əməkdaşların da sayında azalmalar gözlənilir. Məlumata görə, 100-ə yaxın yerli əməkdaşın işinə 2026 və 2027-ci illərdə iki mərhələdə son veriləcək.
“Plana əsasən, yaxın günlərdə əsas şəxslərə məlumat veriləcək və sənəd daha yumşaq ixtisarlar nəzərdə tutur,” – deyə nəşr vurğulayır.
Xumar Emilqızı
14:03 20.05.2025
Oxunuş sayı: 514
