“Türkiyə terrora qarşı mübarizədə həlledici mərhələyə keçib” – Ekspert
PKK-nın silahlı fəaliyyətlərini dayandıraraq özünü buraxdığını açıqlaması bölgədə geniş rezonans doğurub. Təşkilat bu qərarın Ankara tərəfindən artan hərbi və siyasi təzyiqlər fonunda verildiyini bəyan etsə də, Türkiyə tərəfi bu açıqlamaya ehtiyatla yanaşır və prosesi diqqətlə izlədiyini bildirir. Rəsmi Ankara PKK-nın tamamilə silahı yerə qoyaraq təslim olmasının vacib olduğunu vurğulayır.
Mövzuyla bağlı Crossmedia.az-a danışan tarix elmləri doktoru Telman Nüsrətoğlu bildirib ki, hazırkı geosiyasi konfiqurasiya Türkiyənin regional və qlobal əhəmiyyətini daha da artırıb. Onun sözlərinə görə, bir çox güc mərkəzləri Ankarayla əməkdaşlığın qaçılmaz olduğunu qəbul edir.
Ekspert qeyd edib ki, Türkiyə son illərdə milli müdafiə sənayesindən tutmuş xarici siyasətə qədər ciddi irəliləyişlər əldə edib. İraq və Suriyada həyata keçirilən hərbi və diplomatik təşəbbüslər PKK-nın bu bölgələrdəki təsir imkanlarını əhəmiyyətli dərəcədə zəiflədib.
Telman Nüsrətoğlunun fikrincə, Bağdadın PKK-nı rəsmi şəkildə qadağan olunmuş təşkilatlar siyahısına daxil etməsi və İraqla həyata keçirilən “İnkişaf yolu” layihəsi Türkiyənin strateji uğurlarının göstəricisidir. Suriyada isə Ankaraya yaxın mövqe sərgiləyən yeni siyasi qüvvələrin formalaşması bu uğurları daha da gücləndirib.
“Qəhrəman Türk Ordusu həm İraq, həm də Suriya ərazisində həyata keçirdiyi əməliyyatlarla PKK-nın təsir gücünü zəiflədib”, – deyə tarixçi vurğulayıb.
Ekspertin fikrincə, Türkiyənin apardığı məhv etmə əməliyyatları PKK-nı çıxılmaz vəziyyətə salıb və təşkilat bu səbəbdən silahlı mübarizədən imtina etdiyini elan etməyə məcbur olub. Lakin o, təşkilatın bu addımı imperialist dairələrin təsiri ilə atdığını və siyasi fəaliyyətlə yoluna davam etməyə çalışdığını qeyd edib.
Nüsrətoğlu bildirib ki, PKK siyasi müstəvidə mövcudluğunu qorumağa çalışır. Türkiyədə konstitusiyanın dəyişdirilməsi, ana dilində təhsil kimi mövzuların gündəmə gətirilməsi də bu strategiyanın tərkib hissəsi kimi qiymətləndirilir.
Ekspert əlavə edib ki, Suriyada PKK-nın qolu olan YPG də mövcud mövqeyini qorumaq və muxtariyyət əldə etmək niyyətindədir. Bu isə Türkiyəyə qarşı açıq müqavimət kimi dəyərləndirilir.
Telman Nüsrətoğlu bildirib ki, Türkiyənin mövqeyi dəyişməzdir: Suriyanın ərazi bütövlüyü təmin olunmalı və daxilində fəaliyyət göstərən silahlə qrupların ölkənin mərkəzi hakimiyyətinə tabe olunması vacib hesab edilir. Əks halda, Türkiyə sərt və prinsipial mövqeyini davam etdirəcək.
Ekspert sonda qeyd edib: “Yaxın Şərqdə Türkiyəsiz hər hansı bir siyasi və təhlükəsizlik konfiqurasiyasının həyata keçməsi mümkün deyil.”
Fatimə Nəbiyeva
21:59 12.05.2025
Oxunuş sayı: 925
