Gözəllik uğrunda təbii sağlamlıqdan keçmək: Arıqladıcı dərmanların təsiri və təhlükəsi
Son zamanlar insanlar həm cəmiyyətin gözəllik meyarlarına uyğun görünmək, həm də sağlamlıqlarını qorumaq üçün artıq çəkidən azad olmağa çalışırlar. Bu məqsədlə müxtəlif üsullara, xüsusilə də arıqlama dərmanlarına müraciət edilir. Tez nəticə verdiyi üçün bu dərmanlara maraq artsa da, onların yan təsirləri və sağlamlığa zərərləri az deyil. Həkim məsləhəti olmadan istifadə edildikdə ürək-damar, sinir sistemi və maddələr mübadiləsinə mənfi təsir göstərə bilər.
Bu barədə Crossmedia.az-a açıqlama verən Toksikoloq Azər Maqsudov dərmanların hər kəsə deyil, müəyyən şəxslərə mənfi təsir göstərdiyini bildirib: "Artıq çəki, ümumiyyətlə, metabolik dəyişikliklərlə, yəni maddə mübadiləsinin pozulması və dəyişməsi ilə əlaqədardır. Bu vəziyyətdə əsas diqqət yetirilməli məqam şəkərli diabet xəstələri və ondan sonra artıq çəkidən əziyyət çəkən insanlardır. Təbii ki, bu insanlarda yüksək qan təzyiqi və immun sisteminin müqavimətində pozulmalar da müşahidə oluna bilər. Artıq çəki ilə bağlı qəbul edilən dərmanlar həm ümumi müqavimətə təsir göstərə bilər, həm də onu zəiflədə bilər. Bundan əlavə, belə preparatlar qaraciyər və böyrəklərə təsir göstərərək müəyyən fəsadlar yarada bilər".
Toksikoloq həmçinin bu dərmanları istifadə edən şəxərin məqsədlərinə çata biləcəyinidə vurğulayıb: "Bu dərmanlar bəli, məqsədlərinə çataraq çəkini azalda bilər, lakin bu proses müəyyən şərtlər daxilində baş verir və bu şərtlər mütləq şəkildə müalicə həkimi ilə müzakirə olunmalıdır".
Mütəxəssis dərmanların asılılıq yarada və həkimə müraciət olunmadığı halda zəhərlənməyə yol aça biləcəyini qeyd edib:
"Həkim şərtləri xəstəyə bir-bir izah etməlidir. Çünki bu dərmanların istifadəsi nəticəsində müəyyən müddətdən sonra asılılıq əmələ gələ bilər və ya dərman yalnız qısa müddətli təsir göstərə bilər.
Buna görə də, nəzərə almaq lazımdır ki, bu dərmanlar müxtəlif növlərdə olur və onların qəbulu yalnız müalicə həkiminin məsləhəti ilə həyata keçirilməlidir. Əks halda, sonradan daha ciddi fəsadlarla və ya asılılıqla nəticələnə bilər".
Aydan Cəbrayılova
20:40 01.05.2025
Oxunuş sayı: 923
