Eurofighter təyyarələrinin alınması üzrə danışıqlar əvvəlki kimi davam edir
Türkiyənin Milli Müdafiə naziri Yaşar Güler, ölkəsinin Eurofighter qırıcı təyyarələrinin alınması ilə bağlı danışıqlarının əvvəlki templə davam etdiyini açıqlayıb. Nazir, Almaniya hökumətinin təyyarələrin tədarükünü bloklaması ilə bağlı yayılan xəbərlərə münasibət bildirərək, bu məsələ ilə bağlı əsas tərəfdaşlarının Birləşmiş Krallıq olduğunu bildirib.
Crossmedia.az xarici mediaya istinadən bildirir ki, Yaşar Güler jurnalistlərə açıqlamasında “Eurofighter məsələsində hər şey eyni şəkildə davam edir. Bizim müqaviləmiz Almaniya ilə deyil, Birləşmiş Krallıq ilədir. Hər şey plan üzrə gedir”, – deyə qeyd edib.
Onun sözlərinə görə, danışıqlarda hər hansı dəyişiklik və ya geriləmə yoxdur və Türkiyə bu prosesə əvvəlki kimi ciddi yanaşır.
Xatırladaq ki, Almaniyanın nüfuzlu “Handelsblatt” qəzeti 19 aprel tarixində yaydığı məlumatda, Almaniya hökumətinin İstanbulun bələdiyyə sədri Əkrəm İmamoğlunun həbsinə etiraz olaraq Türkiyəyə təxminən 30 ədəd Eurofighter qırıcı təyyarəsinin satışını blokladığını yazmışdı. Bu iddia Ankara ilə Berlin arasında müdafiə sahəsində mümkün gərginliyin siqnalı kimi qiymətləndirilmişdi.
Türkiyə isə bu iddiaları təkzib edərək, danışıqların müsbət məcrada davam etdiyini və hər şeyin əvvəlcədən razılaşdırılmış şəkildə getdiyini vurğulayır. Ankara bu təyyarələrin alınmasının ölkənin müdafiə strategiyasının vacib hissəsi olduğunu və bu istiqamətdə istənilən texniki və diplomatik problemi həll etməyə hazır olduğunu bildirir.
Fatimə Nəbiyeva
21:05 24.04.2025
Oxunuş sayı: 864
