Asim Mollazadə: Onlar öz yaşadıqları ölkənin qanunlarını da poza bilərlər
Sosial şəbəkələrdə yayılan çağırışların hüquqi sərhədləri, dini nifrətin qızışdırılması və rəqəmsal platformalar vasitəsilə ictimai-siyasi proseslərə təsir cəhdləri son dövrdə təhlükəsizlik müstəvisində daha çox müzakirə olunur. Azərbaycanda məktəbli geyim forması ilə bağlı Nazirlər Kabinetinin 21 sentyabr tarixli 309 nömrəli qərarından sonra sosial şəbəkələrdə radikal dini məzmunlu, o cümlədən süni intellektlə hazırlanmış materialların yayılması ilə bağlı cinayət işi başlanıb. Baş Prokurorluğun məlumatına görə, Türkiyə vətəndaşı, jurnalist Cəlal Çiftçi hakimiyyətin zorla ələ keçirilməsinə və konstitusiya quruluşunun dəyişdirilməsinə çağırışlar, eləcə də dini nifrətin qızışdırılması ilə bağlı ittihamlar üzrə təqsirləndirilən şəxs qismində cəlb olunub və beynəlxalq axtarışa verilib. Türkiyəyə beynəlxalq hüquqi yardım üçün müraciətlər də göndərilib. Bu hadisə onlayn ifadə azadlığının hüquqi sərhədləri, qanun pozuntularına münasibətdə məsuliyyət və dövlətlərarası hüquqi əməkdaşlığın əhəmiyyətini yenidən gündəmə gətirir.
Azərbaycan Demokratik İslahatlar Partiyasının sədri, Milli Məclisin deputatı Asim Mollazadə xaricdə yaşayan şəxslərin qanun pozuntularına yol verməsi ehtimalı və onların axtarışı məsələsinə münasibət bildirib. Deputat bu prosesdə beynəlxalq hüquq normalarına və dövlətlərarası əməkdaşlığa diqqət çəkib: “Onlar təkcə Azərbaycanın qanunlarını deyil, yaşadıqları ölkələrin qanunlarını da poza bilərlər. Hər hansı ölkədə dövlət çevrilişinə çağırışlar və bu kimi əməllər beynəlxalq hüquq normalarının pozulması deməkdir. Ona görə də onların axtarışı bilavasitə yaşadıqları ölkələr vasitəsilə, həmin dövlətlərin dəstəyi ilə həyata keçirilməlidir. Bu prosesdə müvafiq beynəlxalq hüquq orqanlarının da iştirakı vacibdir. Belə hallarda hüquqi prosedurların beynəlxalq hüquq normalarına uyğun şəkildə həyata keçirilməsi, aidiyyəti dövlətlərin əməkdaşlığı və müvafiq beynəlxalq hüquq orqanlarının iştirakı xüsusi əhəmiyyət daşıyır”.
Nigar Xəlilli
19:30 17.10.2026
Oxunuş sayı: 67
