Ağırlıq qaldırmaq beyni qoruyur
Braziliyada aparılan bir araşdırma göstərib ki, ağırlıq qaldırmaq yaddaşı gücləndirir və Alzheimer xəstəliyinə qarşı qoruyur.
Crossmedia.az TRT Haber-ə istinadla bildirir ki, bu araşdırma Sao Paulo şəhərində yerləşən Campinas Universitetində keçirilib. Belə ki, alimlər yüngül yaddaş problemi olan 44 nəfəri 6 ay izləyiblər. Bu şəxslərin bir hissəsi həftədə iki dəfə ağırlıq qaldırıb, digərləri isə heç bir məşq etməyib. Məşq edən insanların yaddaşı və beyin quruluşu yaxşılaşıb, digərlərində isə vəziyyət pisləşib.
Araşdırma göstərib ki, ağırlıq qaldırmaq beyində Alzheimer xəstəliyi ilə bağlı olan hissələrin kiçilməsinin qarşısını alır. Eyni zamanda, sinirlərin sağlam qalmasına kömək edir.
Araşdırmanın müəllifi Isadora Ribeiro deyib: “Fiziki inkişaf gözləyirdik, amma yaddaşın da bu qədər yaxşılaşması bizi çox sevindirdi. Bu nəticələr göstərir ki, ağırlıq qaldırmaq demansa (yaddaş itkisinə) qarşı güclü təsir göstərir”.
Tədqiqatçılar bildirirlər ki, bu cür məşqlər sinirlərin böyüməsinə kömək edir və bədəndəki iltihabı azaldır. Onlar düşünür ki, uzun müddətli ağırlıq məşqləri demansın qarşısını ala bilər.
Alimlər bu tip məşqlərin həm faydalı, həm də ucuz olduğunu vurğulayır və fiziki məşqçilərə daha çox dəyər verilməsini tövsiyə edirlər.
Fatimə Məmmədova
21:13 05.04.2025
Oxunuş sayı: 817
