Sahibsiz itlərlə bağlı gücləndirilmiş nəzarət: Yeganə həll yolu qısırlaşdırmadır
Yay aylarına yaxınlaşdıqca sahibsiz itlərin nəzarət altına alınması üçün tədbirlər gücləndirilir. Bayram günlərində də maksimum rejimdə işlədiklərini bildirən İDEA Heyvanlara Qayğı Mərkəzinin icraçı direktoru Heyran Hüseynova məsələ ilə bağlı Crossmedia.az-a açıqlama verib.
"Biz itlərə nəzarəti bayram günlərində maksimum gücləndirilmiş rejimdə həyata keçirdik. Əməkdaşlarımız – həkimlərimiz, işçilərimiz nə məzuniyyətə, nə istirahətə, nə də bayram günlərinə buraxılmadılar. Çünki yay fəslinə yaxınlaşırıq və insanlar küçələrdə, açıq havada daha çox vaxt keçirirlər. Uşaqlar həyətlərdə oynayırlar və bu da müəyyən təhlükələr yaradır", – deyə H.Hüseynova bildirib.
Onun sözlərinə görə, sahibsiz itlərin nəzarət altına alınmasının yeganə effektiv yolu qısırlaşdırmadır. Mərkəzin əməkdaşları sakinlərin şikayəti əsasında itləri tutaraq müvafiq prosedurlardan keçirmək üçün mərkəzə gətirirlər. Bunun üçün xüsusi qaynar xətt fəaliyyət göstərir. Şikayət daxil olan kimi it tutan əməkdaşlar həmin ünvana yönləndirilir və heyvanlar humanist üsulla tutulur.
"Mərkəzimizdə 15-ə yaxın baytar həkim çalışır, geniş imkanlara malik klinikamız var. İl ərzində 4000-ə yaxın it tutulur və qısırlaşdırılır. Aqressiv olmayan, insanlara hücum etməyən itlər yenidən götürüldükləri ərazilərə buraxılır. Lakin aqressiv və şikayət olunan itlər xüsusi nəzarət altında saxlanılır və heyvansevərlərin baxdığı ərazilərə yerləşdirilir", – deyə o əlavə edib.
H.Hüseynovanın fikrincə, heyvanları məhv etmək çıxış yolu deyil. Qısırlaşdırma zamanı eyni zamanda heyvanlara quduzluğa qarşı peyvənd vurulur ki, bu da onların aqressiyasını 90% azaldır.
"İtlər hürməlidir, bu normaldır. Amma sterilizasiyadan sonra onların aqressiyası demək olar ki, yoxa çıxır. Bundan əlavə, quduzluğa qarşı peyvənd olunduqlarına görə, təsadüfən bir uşağı dişləsələr belə, artıq quduzluq təhlükəsi olmayacaq. Çünki peyvənd olunmuş heyvan xəstəliyi yaya bilmir", – deyə o vurğulayıb.
H.Hüseynova qeyd edib ki, heyvanların aqressiv davranışlarının əsas səbəbi insan faktorudur.
"Biz televiziya xəbərlərində heyvanların aqressiyasından danışıldığını eşidirik. Ancaq unutmayaq ki, aqressiyanın kökündə insan dayanır. İnsanlar heyvanlara daş atmasa, qıcıqlandırmasa, onlara normal yanaşsa, aqressiya da olmaz", – deyə o fikrini tamamlayıb.
Nihat Tahirov
09:47 04.04.2025
Oxunuş sayı: 24188
