Deputatdan mühüm açıqlama: Qərbi Zəngəzur ilə bağlı da lazımi addımlar atılır
Azərbaycan Prezidenti İlham Əliyev almaniyalı həmkarı Frank-Valter Ştaynmayer ilə birgə keçirdiyi mətbuat konfransında
Ermənistanla sülh müqaviləsinin imzalanması üçün şərtləri açıqlayıb.
"Bu günə qədər sülh müqaviləsinin mətni tam razılaşdırılıb, 17 paraqrafdan ibarətdir. Azərbaycan burada hər hansı bir əlavə şərt irəli sürmür. Bizim şərtlərimiz Ermənistan üçün bəllidir, yenilik deyil. Bu şərtləri biz uzun müddət ərzində irəli sürürük. Ancaq Ermənistandan bu günə qədər hər hansı bir ciddi cavab almamışıq. Nədən ibarətdir bu? Birinci, ATƏT-in Minsk qrupu ləğv edilməlidir.
Dövlət başçısı əlavə edib: “İkinci məsələ Ermənistanın konstitusiyası ilə bağlıdır. Ermənistan konstitusiyasında Ermənistan müstəqillik aktına istinad var. O konstitusiyanın tərkib hissəsidir. Orada isə Azərbaycanın hüquqi, tarixi ərazisinin Ermənistanla birləşməsi haqqında müddəa var və bu, bizə qarşı açıq ərazi iddiası sayılır. Ona görə Ermənistan konstitusiyasından bu bəndin çıxarılması bizim legitim tələbimizdir. Bu iki şərt təmin olunandan sonra sülh müqaviləsini imzalamaq üçün heç bir maneə olmayacaq. Necə deyərlər, top Ermənistanın tərəfindədir. Əgər Ermənistan doğurdan da sülh müqaviləsini imzalamaq istəyirsə, Azərbaycanın bu iki legitim şərtini qəbul etməlidir”.
Prezidentin səsləndirdiyi fikirlər barədə Milli Məclisin deputatı Anar İsgəndərov Crossmedia.az saytına açıqlama verib. Onun sözlərinə görə, Qərbin Ermənistana dəstəyinə baxmayaraq geosiyasi meydanda üstünlük Azərbaycandadır:
"1919-cu ildə Azərbaycan Cümhuriyyəti nümayəndə heyəti ilə Ermənistan nümayəndə heyəti arasında 3 görüş oldu. Hər üç görüş yarımçıq qaldı. Amma Ermənistan görüş başa çatmamış, yarımçıq görüşdən qaçan kimi bəyanat verirdi ki, biz hazırıq, müqavilə imzalayacağıq. Erməni məkrini bilməyən adam erməniyə inana bilər. Amma biz artıq o məkrin nə olduğunu bilirik. Bu gün də Ermənistan sülh müqaviləsini imzalamamaq, Qərbi bir daha öz göz yaşlarına inandırmaq üçün əlindən gələni edir. Erməni haradasa bir söz desin və onun arxasında dayansın – belə bir hal hələ olmayıb. Digər tərəfdən, Qərb də erməniyə meyillidir. Almaniyanın prezidenti niyə Ermənistanda ləğv olunmuş qurumun əsgi parçasında qaldırmalıdır və ya etnik təmizləməni niyə müdafiə etməlidir? Almaniya bunun əvəzinə Ermənistanı məcbur etməlidir ki, bu müqaviləni imzalasın. Amma göz yaşı tökən ermənini müdafiə edir. Həm də heç bir səbəb olmadan. 30 il ərzində Almaniya bir dəfə olsun, işğala məruz qalan və işğal edən arasındakı fərqi gördümü? Həmin Almaniyadır, həmin Qərbdir və həmin Ermənistandır. Ona görə də tarix təkrarlanır: o zaman Ermənistanı müdafiə edən Qərb yenə eyni cür davranır. Burada dəyişən nədir? Bu gün dəyişən Azərbaycandır. Azərbaycan Ermənistanı ağır məğlubiyyətə uğradıb. Daha meydan erməninin deyil. Bu gün meydan nə Cənubi Qafqazda, nə bölgədə, nə də ümumiyyətlə, dünyanın heç bir yerində erməninindir – meydan Azərbaycanındır. Fransa hansı mövqeyin tərəfdarıdırsa, Almaniyanın prezidenti də həmin mövqeyi tutdu. Lakin Azərbaycandan sərt təpki görəndən sonra üzr istədi".
Parlamentari söyləyib ki, Azərbaycanın güclənməsi Ermənistanı narahat edir: "Azərbaycan gücləndikcə Ermənistanın faciəsi artacaq. Son nəticədə Ermənistan Azərbaycanın ayaqları altına yıxılacaq. Çünki nə o torpaq onundur, nə də o haqq onundur. Ona görə də o, heç vaxt Azərbaycan torpaqlarında meydan sulaya bilməz. Bu gün Azərbaycan Qarabağı və Şərqi Zəngəzuru işğaldan azad edib. Amma əminəm ki, Qərbi Zəngəzur ilə bağlı da lazımi addımlar atılır. Bu addımların ən birincisi onun tarixidir. O tarix ki, hər gün təbliğ olunur, insanlar maarifləndirilir və dünyaya bəyan edilir. 30 il ərzində meydan sulamağa çalışan Ermənistan 2020-ci ildən sonra öz faciəsini başa düşdü. Başa düşdü ki, artıq azərbaycanlılar əvvəlki azərbaycanlı deyil. Azərbaycan güclüdür, qüvvətlidir. Onun qətiyyətli dövlət başçısı var. Qərbin heç bir təsirini qəbul etməyən dövlət başçısı var. O dövlət başçısının ətrafında birləşən Azərbaycan xalqı var. Xalqın yetişdirdiyi Azərbaycan əsgəri var".
Nuray Qurbanlı
16:21 02.04.2025
Oxunuş sayı: 1596
