Müsbət mesaj var: İran - Azərbaycan əlaqələri inkişaf edir
İran və Azərbaycan münasibətlərinin son dövrlər müəyyən siyasi dairələr vasitəsilə pozulması cəhdinin qarşısı məhz iki dövlət arasındakı mehriban qonşuluq münasibətləri nəticəsində alındı. Azərbaycanın İranda konsulluğunun fəaliyyətini bərpa etməsi, qarışıqlıqlı rəsmi səfərlər çərçivəsində bütün dünya iki dövlət arasındakı münasibətlərdən xəbərdardır. Bu günlərdə İranın xarici məsələlər üzrə müşaviri Mehdi Sənayi Azərbaycana səfər edib. Həmçinin İran Prezidenti Məsud Pezaşkianın da Azərbaycana səfəri gözlənilir.
Hər iki mühüm hadisə kontekstində Bakı- Tehran münasibətləri barədə Milli Məclisin deputatı Aydın Mirzəzadə Crossmedia.az-a açıqlama verib: "Müəyyən fasilədən sonra Azərbaycanın İrandakı səfirinin fəaliyyətini bərpa etməsi Azərbaycan-İran münasibətlərini yenidən intensivləşdirdi. Onsuz da münasibətlərimiz hər zaman mehriban qonşuluq səviyyəsində olub. Arada İrandan Azərbaycanın suverenliyinə toxunan bəzi siyasi xarakterli bəyanatlar verilsə də, Azərbaycan yenə də İranla yaxın münasibətlər saxlamağa çalışıb. Bu bəyanatları isə biz İranın rəsmi mövqeyi deyil, ayrı-ayrı dairələrin mövqeyi kimi qəbul edirdik. Görünən odur ki, həm aviaqəzada həlak olan əvvəlki prezident, həm də yeni seçilmiş prezident Azərbaycanla münasibətlərə xüsusi diqqət yetirir. İran prezidentinin Azərbaycana səfəri gözlənilir. İranın xarici məsələlər üzrə müşavirinin Azərbaycana səfəri isə iki dövlət arasında münasibətləri bir daha nəzərdən keçirmək və hər iki dövlətin marağında olan məsələləri müzakirə etmək məqsədi daşıyır. Hesab edirəm ki, hər iki tərəfin yaxşı münasibətlər istəyi günü-gündən daha da möhkəmlənəcək və biz bunu real həyatda, real layihələrdə görəcəyik".
Ayhan Ağarzayev
14:16 02.04.2025
Oxunuş sayı: 828
