2 aprel - Dünya Autizm Məlumatlandırma Günüdür
BMT-nin 18 dekabr 2007-ci il tarixli qərarı ilə 2 aprel - Dünya Autizm Məlumatlandırma Günü kimi təsis edilib. Bu günün qeyd edilməsində məqsəd əhali arasında autizm haqqında maarifləndirməni artırmaq və autizmli insanların həyat keyfiyyətinin yaxşılaşdırılmasına kömək etməkdir. Bu gün, dünyada milyonlarla insanın həyatını təsir edən bir mövzuya fokuslanaraq, autizmli fərdlərin cəmiyyətə inteqrasiyası və onlara dəstək verilməsi ilə bağlı daha geniş bir şüur formalaşdırmağı hədəfləyir.
Bütün dünyada olduğu kimi, Azərbaycanda da bu gün hər il geniş miqyasda qeyd olunur. Nazirlər Kabinetinin 2015-ci il 30 dekabr tarixli 413 nömrəli qərarı ilə təsdiq edilmiş “Əlilliyi və sağlamlıq imkanlarının məhdudluğunun müəyyən olunması meyarlarına dair Əsasnamə”nin 3.1.7-ci bəndində autizm sindromuna görə uşaqların sağlamlıq imkanlarının məhdudluğunun müəyyən olunması öz əksini tapıb. Bu qərar autizmli uşaqların və onların ailələrinin sosial, təhsil və sağlamlıq xidmətlərindən bərabər şəkildə faydalanmalarını təmin etməyi hədəfləyir. Autizmli insanlar bəzən cəmiyyətin müəyyən “qəliblərinə” uyğun gəlmir, lakin onların öz dünyası bizə başqa bir baxış bucağı təqdim edir. Onlar həyatın daha incə detalları ilə maraqlanır, başqalarının fərqinə varmadığı şeyləri hiss edirlər. Bu fərqliliklər, əslində, bizim dünyamıza dəyər qatır. Həyat isə fərqliliklər ilə daha gözəl və rəngarəngdir.
Mövzu ilə bağlı Crossmedia.az-a açıqlama verən Azərbaycan Autizm Assosiasiyasının sədri Elnur Məmmədli bildirib ki, aprel ayı dünyada “Autizm Maarifləndirmə Ayı” kimi qeyd olunur:
“Azərbaycanda da bu səbəbdən aprel ayı boyunca müxtəlif təşkilatlar tərəfindən müxtəlif tədbirlər və layihələr həyata keçirilir. Biz, Autizm Assosiasiyası olaraq, nəinki aprel ayında, bütün il ərzində təqvim planına uyğun şəkildə ictimaiyyəti və ailələri maarifləndirmək, autizm spektr pozuntusu olan uşaqların cəmiyyətə inteqrasiyasını təmin etmək üçün bir sıra işlər görürük.
Azərbaycanda bu sahədə vəziyyətə gəlincə, son illərdə autizm mövzusunda müxtəlif tədbir və layihələrin həyata keçirilməsinə baxmayaraq, hələ də bir sıra problemlər mövcuddur. Bu problemlər arasında ən önəmlilərindən biri statistika çatışmazlığıdır. Bu uşaqlar və onların ailələri ilə bağlı kifayət qədər məlumat mövcud deyil. Digər bir mühüm məsələ dövlət proqramlarının və qanunvericiliklə bağlı tədbirlərin tətbiqi ilə əlaqədardır.
Nəzrin Salmanova
11:43 02.04.2025
Oxunuş sayı: 1277
