Harvard Universitetində qalmaqal: Türk tarixçi işdən çıxarıldı
Harvard Universiteti Yaxın Şərq Araşdırmaları Mərkəzinin rəhbəri, türkiyəli tarixçi professor Camal Kafadar vəzifəsindən uzaqlaşdırılıb.
Crossmedia.az xarici mediaya istinadən bildirir ki, Harvard Crimson tələbə qəzetinin məlumatına görə, Kafadar və onun köməkçisi Rosie Bşir Sosial Elmlər Fakültəsinin müvəqqəti dekanı Devid Katler tərəfindən işdən çıxarılıb. Bu qərarın Harvard Yəhudi Məzunları Alyansının ötən may ayında dərc etdiyi hesabatdan sonra verildiyi bildirilir. Hesabatda Yaxın Şərq Araşdırmaları Mərkəzi İsraili müstəmləkəçi və məskunlaşan dövlət kimi təqdim etdiyinə görə tənqid olunub. Mərkəzin irqçilik, aparteid və soyqırım ittihamlarını irəli sürdüyü, İsrail-Fələstin münaqişəsinə qeyri-mütənasib diqqət yetirdiyi vurğulanıb.
Harvard Universitetinin İncəsənət və Elmlər Fakültəsinin sözçüsü Ceyms Çişolm bu məsələ ilə bağlı şərh verməkdən imtina edib və bunun “kadr məsələsi” olduğunu bildirib.
Universitetlərdə İsrail tənqidçilərinə təzyiqlər artır.
Son dövrlərdə ABŞ universitetlərində İsraili tənqid edən professorlar və tələbələr təzyiqlərə məruz qalır. Fələstinə dəstək verənlər hədəfə alınır, universitet rəhbərlikləri isə antisemitizm ittihamlarına qarşı sərt addımlar atır.
Harvard Universitetinin Xalq Sağlamlığı Məktəbi də təzyiqlərə boyun əyərək, Qərb Sahilindəki Birzeit Universiteti ilə tədqiqat əməkdaşlığını dayandırıb.
Bu arada, Kolumbiya Universitetinin prezidenti Katrina Armstronq da istefa verəcəyini açıqlayıb. Onun istefası universitetin kampusda “antisemit hadisələrə qeyri-adekvat reaksiya verməsi” ilə bağlı tənqidlər fonunda baş verib. Bundan bir neçə həftə əvvəl Donald Tramp administrasiyası universitetin İsraili tənqid edən səsləri yatırtmaq üçün siyasət dəyişiklikləri etməsini tələb edərək 400 milyon dollarlıq federal maliyyəni dondurmuşdu.
Zəhra Ağayeva
11:55 31.03.2025
Oxunuş sayı: 1038
