ABŞ Çinlə müharibə üçün yeni nəsil döyüş təyyarəsini təqdim etdi
ABŞ Prezidenti Donald Trampın elan etdiyi 20 milyard dollarlıq "gizli layihə" – F-47 döyüş təyyarəsi hərbi aviasiya texnologiyasında yeni mərhələ açacaq. Belə ki, süni intellekt dəstəyi, hipersəs raketləri daşıma qabiliyyəti və radarlara qarşı görünməzliyi ilə seçilən bu altıncı nəsil döyüş təyyarəsinin 2027-ci ildə istifadəyə verilməsi planlaşdırılır.
Crossmedia.az xəbər verir ki, bu barədə Türkiyənin “Haberglobal” televiziyasının saytı məlumat yayıb.
ABŞ Müdafiə Nazirliyinin (Pentaqon)Tayvan və Cənubi Çin dənizində artan gərginlik səbəbindən F-47 layihəsini sürətləndirdiyi bildirilir. Ekspertlər yeni təyyarənin Çin hava hücumundan müdafiə sistemlərini təsirsiz hala gətirə biləcəyini düşünürlər.
Bu yeni döyüş təyyarəsi ABŞ-nin maliyyə çətinlikləri yaşayan aviasiya nəhəngi Boeing tərəfindən istehsal ediləcək. F-47-nin texniki detallarının məxfi saxlanıldığı bildirilir. Lakin onun müasir hava döyüş strategiyalarına uyğunlaşdırıldığı, pilotsuz uçuş aparatları (PUA) ilə inteqrasiyaya malik olduğu və düşmənə "sürü hücumu" həyata keçirə biləcəyi qeyd olunur. Saatda təxminən 2500 km sürətlə hərəkət edə biləcək bu qırıcı, ABŞ-nin Hərbi Hava Qüvvələrinin Yeni Nəsil Hava Üstünlük Proqramı (NGAD) çərçivəsində F-22-nin yerini almaq üçün hazırlanır.
Qeyd olunub ki, ABŞ-nin Konqresi F-47 layihəsinə ehtiyatla yanaşır. Əvvəllər F-35 qırıcılarının bir sıra texniki problemləri və yüksək xərcləri nəzərə alınaraq, yeni təyyarənin istehsalı ilə bağlı şübhələr var. Konqres üzvləri Boeing-in bu müqaviləni almasına da tənqidi yanaşır və daha əvvəl Lockheed Martin-in seçilməsini üstün tuturdu.
Həmçinin, təyyarənin hər birinin 300 milyon dollara başa gəlməsi Konqresdə müzakirə edilən əsas məsələlərdən biridir.
Bundan əlavə, ABŞ-nin Respublikaçılar Partiyasına yaxınlığı ilə tanınan The National Interest nəşri F-47-nin Çinə qarşı mümkün müharibə üçün hazırlandığını və ABŞ-nin bu qırıcıları əsasən Sakit Okeanda yerləşdirməyi planlaşdırdığını yazıb. Mütəxəssislər bu təyyarənin F-35-dən daha üstün imkanlara sahib olacağını bildirirlər.
Bildirilir ki, F-47-nin süni intellektə əsaslanan idarəetmə və elektron müharibə sistemləri ilə təchiz olunacağı gözlənilir.
Həmçinin, ABŞ-nin Breaking Defense nəşri Boeing-in bu layihə çərçivəsində yeni iş yerləri açacağını və Missuri ştatının St. Luis şəhərindəki istehsal müəssisələrini 1,9 milyard dollar dəyərində genişləndirdiyini yazıb.
Qeyd edək ki, F-47 ABŞ-nin hərbi aviasiya sahəsində yeni güc mərkəzi yaratmaq niyyətində olduğunu göstərir.
Bu yeni qırıcı Pekin və Vaşinqton arasında gərginlik fonunda hərbi balansı dəyişdirə biləcək bir addım kimi qiymətləndirilir.
Fatimə Məmmədova
18:08 30.03.2025
Oxunuş sayı: 10894
