ABŞ polisi Harvardda çalışan rus alimi saxlayıb
Harvard Tibb Məktəbində çalışan rusiyalı alim Kseniya Petrova ABŞ İmmiqrasiya və Gömrük Mühafizəsi (ICE) tərəfindən saxlanılıb və deportasiya ilə üzləşə bilər.
Crossmedia.az xarici mediaya istinadən bildirir ki, Petrova Fransadan Boston Loqan Beynəlxalq Hava Limanına qayıdarkən ABŞ səlahiyyətliləri tərəfindən dayandırılıb. Onun vizası ləğv edilib və Rusiyaya deportasiya ediləcəyi bildirilib. Siyasi təzyiqlərdən narahat olduğunu deyərək müqavimət göstərdiyi üçün alim əvvəlcə Vermontdakı mərkəzə, sonra isə Luizianadakı ICE tərəfindən icarəyə götürülmüş həbsxanaya köçürülüb.
Petrovanın direktoru Leon Peşkin onun Rusiyaya qaytarılmaqdan ciddi narahatlıq keçirdiyini bildirib. Məlum olub ki, o, Moskvada Rusiyanın Ukraynaya müdaxiləsinin ilk günlərində müharibəyə etiraz edib və Vladimir Putinin hakimiyyətdən getməsini tələb etdiyinə görə saxlanılıb. Daha sonra Gürcüstana, oradan isə ABŞ-a gedərək genetik tədqiqatlarını davam etdirib.
Fevralda Parisdə olarkən, işəgötürəni ondan Harvard laboratoriyasına gətirmək üçün Fransadakı həmkarlarından qurbağa embrion nümunələri götürməsini istəyib. Peşkin bu nümunələrin idxalının qanuni olduğunu, lakin Petrovanın ABŞ gömrüyündə səhv forma doldurduğunu və buna görə saxlanıldığını bildirib. Qanuna əsasən, belə səhvə görə cəza maksimum 500 dollar cərimədir, lakin immiqrasiya rəsmiləri onun yenidən ABŞ-a daxil olmasına icazə verməyib.
Petrova sığınacaq üçün müraciət edib və məhkəməni gözləyir. Peşkin onun girov müqabilində azadlığa buraxılmalı olduğunu desə də, son zamanlar belə hallar baş vermir. Həmkarı Cora Anderson Petrova üçün GoFundMe kampaniyası başladıb, çünki o, yeni viza üçün müraciət etsə də, bu proses aylarla çəkəcək və bu müddətdə maaş ala bilməyəcək.
Petrovanın saxlanılması ABŞ-ın mühacir akademiklərə qarşı sərt siyasətinin bir hissəsi kimi qiymətləndirilir. Son həftələrdə Fələstinə dəstək verən bir neçə universitet tələbəsi və tədqiqatçı da saxlanılıb. Onların arasında Tufts Universitetinin doktorantı, 30 yaşlı Türkiyə vətəndaşı Rümeysa Öztürk də var. Öztürkün maskalı federal zabitlər tərəfindən saxlanılması böyük rezonans doğurub.
Zəhra Ağayeva
15:40 28.03.2025
Oxunuş sayı: 6338
