Xarici xəbərlər

2600 illik sirr açıldı – Qədim mətbəxdə nələr tapıldı?

Türkiyənin Balıkəsir vilayətində yerləşən Daskyleion Antik şəhərində aparılan arxeoloji qazıntılar zamanı təxminən 2600 il əvvələ aid karbonlaşmış toxumlar aşkarlanıb. Tapıntılar qədim dövrdə insanların qidalanma vərdişləri, ərzaqları necə saxlaması və yeməkləri hansı şəraitdə hazırlaması barədə yeni məlumatlar ortaya qoyur.

Crossmedia.az xəbər verir ki, bu barədə “Anadolu” agentliyi məlumat yayıb. Qazıntılar Manyas gölünün sahilində yerləşən və tarixi təxminən 3 min il əvvələ gedib çıxan Daskyleion Antik şəhərində Muğla Sıtkı Koçman Universitetinin professoru Kaan İrenin rəhbərliyi ilə aparılır. Tədqiqatlar Türkiyənin Mədəniyyət və Turizm Nazirliyi, Balıkəsir Valiliyi, yerli bələdiyyələr və universitetin dəstəyi ilə həyata keçirilir.

Arxeoloqların “Lidiya mətbəxi” adlandırdığı ərazidə yeni sobalar aşkarlanıb. Qazıntılar zamanı siyez və digər qədim buğda növləri, altısıralı arpa, noxud, mərcimək, paxla, vələmir, göyərti bitkiləri və üzüm toxumları tapılıb. Çoxsaylı toxumların aşkarlandığı ana qaya çuxurunun isə taxıl saxlamaq üçün istifadə edildiyi müəyyənləşdirilib.

Qazıntı qrupunun mütəxəssis arxeoloqu Yeşim Kirman bildirib ki, bu il aparılan işlər zamanı “Lidiya mətbəxi”ndə daha bir soba üzə çıxarılıb və beləliklə, aşkar edilən sobaların sayı yeddiyə çatıb. Sobanın daxilində aparılan tədqiqatlarda toxumlarla yanaşı, balıq və quş sümükləri də tapılıb.

Kirmanın sözlərinə görə, üzvi materialların minilliklər ərzində qorunması çətin olsa da, qapalı təbəqədə karbonlaşmış vəziyyətdə qalan toxumlar günümüzədək gəlib çatıb. Onların növü və yaşı laboratoriya şəraitində müəyyənləşdirilir.

Tapıntılar göstərir ki, qədim lidiyalılar bu gün də istifadə edilən bir sıra taxıl və paxlalı bitkilərlə qidalanıblar. Arxeoloqlar aşkar edilmiş əşyaların xüsusiyyətlərinə əsasən, mətbəxin yüksək sosial təbəqəyə mənsub insanlar tərəfindən istifadə olunduğunu ehtimal edirlər.