Professor: "Süni intellektin səhiyyədə tətbiqi ilə də xeyli irəliləyişlər əldə edilə bilər"
Səhiyyə naziri Teymur Musayev bu günlərdə jurnalistlərə açıqlamasında deyib ki, Azərbaycanda gündəlik tibbi praktikada süni intellektin tətbiqi planlaşdırılır. O, hazırda radiologiyada süni intellektdən istifadə edildiyini və yaxın zamanda bu tətbiqin digər sahələrdə də genişləndiriləcəyini və bir neçə başqa sahədə istifadə ediləcəyini bildirib.
Bu, Azərbaycan tibbinin inkişafında yeni mərhələ kimi qiymətləndirilə bilər. İndi əsas bunun nə qədər real və effektiv olacağı ilə bağlıdır.
Bu barədə Crossmedia.az-a danışan həkim-professor Adil Qeybulla süni intellektin ictimai həyatın müxtəlif sahələrində tətbiqi ilə bağlı müəyyən nailiyyətlərin əldə olunduğunu və böyük perspektivlərin olduğunu bildirib: "Xüsusilə tibb sahəsində süni intellektin kibernetik sistemlərdə istifadəsi nəzərdə tutulur. Belə sistemlər müxtəlif proqramların icrası istiqamətində işləyir və süni intellekt bu prosesləri daha effektiv yerinə yetirə bilər".
"Baxmayaraq ki, süni intellekt daim inkişaf edir, o, insan kimi yaradıcı intellektə sahib ola bilməz. Lakin ümumi assosiativ əlaqələrdən çıxış edərək fərqli nəticələr yarada bilər. Müxtəlif diaqnozlar, klinik əlamətlər və məlumat bazaları süni intellektə ötürüldükdə, o, konkret yol göstərə bilər. Bununla belə, insanı tamamilə əvəz etməsi mümkün deyil, lakin onun böyük yardımçısı ola bilər", – A. Qeybulla vurğulayıb.
Professor qeyd edib ki, müasir tibbdə bir sıra ciddi yeniliklər var: "Xüsusilə, manipulyativ biologiya və adoptiv immunologiya tibbin böyük inkişaf sahələridir. Süni intellektin səhiyyədə tətbiqi ilə də xeyli irəliləyişlər əldə edilə bilər. Bunun üçün səhiyyə sistemi strukturlaşdırılmalı və xüsusi proqramlar hazırlanmalıdır. Bu proqramlar vasitəsilə orqan donorluğu ilə bağlı qanun işlək mexanizm əldə edə bilər, qan bankı ölkə üzrə daha aktiv və effektiv fəaliyyət göstərə bilər, eləcə də müxtəlif xəstəliklərin müştərək konsultasiyası aparıla bilər. Bu, həm vaxt itkisini azaldacaq, həm də diaqnostika və müalicə prosesinin daha effektiv olmasını təmin edəcək. Hesab edirəm ki, süni intellektin tibdə tətbiqi müsbət təsir göstərəcək".
Fatimə Məmmədova
14:10 25.03.2025
Oxunuş sayı: 978
