Ermənistana etimad sıfıra bərabərdir- Deputat sərt danışdı
Martın 18-i saat 22:20-dən martın 19-u saat 01:40-dək Ermənistan silahlı qüvvələri Basarkeçər rayonunun Zod və Yuxarı Şorca istiqamətlərində Azərbaycan Ordusunun mövqelərini atəşə tutub.
Bu hadisələr, sanki tarixdə təkrar olunan bir ssenarilərə bənzəyir. Ermənistanın təxribatları, yalnız sərhədlərdə deyil, həm də beynəlxalq platformalarda özünü göstərir. Sülh danışıqlarında irəliləyiş əldə edildiyi bir vaxtda belə, Ermənistanın bu cür addımları, onun sülhə deyil, gərginliyə üstünlük verdiyini sübut edir. Bu, yalnız Azərbaycan üçün deyil, bütün region üçün təhlükə yaradır.
Azərbaycan tərəfi isə hər zaman olduğu kimi, sülhə sadiqliyini nümayiş etdirir. Sülh isə yalnız bir tərəfin istəyi ilə mümkün deyil, bu, qarşılıqlı etimad və əməkdaşlıq tələb edir.
Bu təxribatlar, Ermənistanın beynəlxalq ictimaiyyət qarşısında özünü sülhpərvər kimi göstərmək cəhdlərinin əslində bir maskadan ibarət olduğunu bir daha sübut edir. Azərbaycan xalqı isə bu təxribatlara baxmayaraq, öz haqq işində mətin və qətiyyətlidir. Çünki haqqın və ədalətin gec-tez qalib gələcəyinə inam heç vaxt sarsılmır…
Crossmedia.az mövzu ilə bağlı Milli Məclisin deputatı Müşfiq Cəfərova müraciət edib.
Deputat ilk olaraq bildirib ki, Ermənistanın atəşkəsi pozması birbaşa sülhə təhdiddir: “Ermənistan rəhbərliyi bir yandan Azərbaycanla Ermənistan arasında sülh sazişi mətninin razılaşdırılması üzrə danışıqların başa çatdığını bildirir, pozitiv fikirlər ifadə edir, digər tərəfdən isə Ermənistanın silahlı qüvvələri şərti sərhəddə, qoşunların təmas xəttində atəşkəsi pozurlar.
Hətta Ermənistan baş naziri Nikol Paşinyan region ölkələrinin rəhbərlərinə sazişin mətni barədə məlumat xarakterli telefon zəngləri də edir. Buradan da məlum olur ki, Ermənistan rəhbərliyinin sülhlə bağlı fəaliyyətində ciddi təzadlar var. Məhz buna görə Prezident İlham Əliyev martın 13-də XII Qlobal Bakı Forumundakı çıxışında rəsmi İrəvana etimadın sıfıra bərabər olduğunu vurğulayıb”.
M.Cəfərovun sözlərinə görə, uzun fasilədən sonra eşidilən güllə səsləri Azərbaycanın Ermənistana olan etimadsız yanaşmasına haqq qazandırır: “Dövlətimizin başçısı İlham Əliyev martın 13-də “Euronews” telakanalına müsahibəsində Azərbaycan – Ermənistan münasibətləri ilə bağlı danışarkən də bu fikirləri vurğulayıb.
Amma Azərbaycanla Ermənistan arasında sülh sazişi layihəsinin tam razılaşdırılması barədə məlumat yayılandan dərhal sonra İrəvan təxribatlara start verməsi də bir ənənədir. Belə ki, Ermənistanın Baş naziri Nikol Paşinyan bir yandan beynəlxalq ictimaiyyətə sülh tərəfdarı kimi görünməyə çalışır, digər tərədən atəşkəs pozuntuları baş verir və intensivləşir. Ermənistanın əvvəlki rəhbərləri də sülhdən danışıb, eyni zamanda hərbi təxribatlara yol verib. Təəssüf ki, özünü demokrat adlandıran Nikol Paşinyan da eyni yolu gedir”.
Nəzrin Salmanova
16:23 19.03.2025
Oxunuş sayı: 1047
