Almaniya Parlamenti müdafiə xərclərinin artırılmasını təsdiqlədi
Almaniya Parlamenti (Bundestag) 18 martda keçirilən səsvermədə müdafiə xərclərinin artırılmasına imkan verən qanun layihəsini üçdə iki səs çoxluğu ilə qəbul etdi. Layihə, müdafiə və təhlükəsizlik xərcləri üçün konstitusiyada müəyyən edilmiş yuxarı həddin ləğvini və 500 milyard avroluq infrastruktur fondunun yaradılmasını nəzərdə tutur.
Crossmedia.az xarici KİV-ə istinadən bildirir ki, qərarın qüvvəyə minməsi üçün Bundestratda da təsdiqlənməsi tələb olunur. Əgər təsdiqlənərsə, Almaniya müdafiə xərclərində “borc əyləci” məhdudiyyətindən azad olacaq. Bu səsvermə, yaxın zamanda kansler olması gözlənilən Fridrex Merz üçün böyük siyasi qələbə hesab edilir.
Mütəxəssislər bu qərarın Avropanın müdafiə siyasətinə təsir edəcəyini bildirir. Son dövrlərdə Rusiyanın Ukraynada qazandığı üstünlüklər və ABŞ-nin Avropadakı müdafiə siyasəti ilə bağlı qeyri-müəyyənliklər hərbi xərclərin artırılması ehtiyacını gündəmə gətirib. Almaniya keçən il müdafiə büdcəsini 23%, Avropa isə 11,7% artırıb.
Digər tərəfdən, Almaniyada bəzi siyasi partiyalar, o cümlədən sağçı Almaniya üçün Alternativ Partiyası (AfD) və solçu Die Linke bu qərara qarşı çıxır. Yeni parlament 25 martda fəaliyyətə başlayacaq və Merz, hazırkı parlament tərkibində bu qanunu həyata keçirmək üçün çalışır.
Bu qərarın Avropa İttifaqının 800 milyard avroluq “Avropanı yenidən silahlandırma fondu” ilə əlaqəsi olduğu bildirilir. Əgər qanun layihəsi rədd edilərsə, Avropanın müdafiə strategiyasında çətinliklər yarana bilər. ABŞ-nin Avropadakı müdafiə siyasətində qeyri-müəyyənliklər artdığı bir vaxtda, Almaniyanın bu addımı NATO-nun Avropadakı müdafiə yükünün yenidən bölüşdürülməsinə səbəb ola bilər.
Mədinə Cəlilova
21:18 18.03.2025
Oxunuş sayı: 1532
