Fəsil dəyişmələri: müxtəlif xəstəliklərin kəskinləşməsi
Baharın gəlişi ilə təbiət canlanır, ağaclar çiçək açır. Lakin bahar fəsli hamı üçün eyni hissləri yaratmır. Bəzi insanlar üçün bahar il boyu gözlənilən sevinc mənbəyi olduğu halda, digərləri üçün allergiya, göz yaşarması və yorğunluq kimi problemlərlə dolu bir mövsümə çevrilir. Bəs bunun əsas səbəbləri nədir?
Mövzu ilə bağlı tibb elmləri doktoru, professor Adil Qeybulla Crossmedia.az-a açıqlamasında fəsil dəyişmələri zamanı müxtəlif xəstəliklərin kəskinləşdiyini bildirib:
"Xüsusilə allergik, sinir və mədə-bağırsaq xəstəlikləri bu dövrlərdə daha çox aktivləşir. Həkimlər həmişə tövsiyə edirlər ki, bu tip xəstəliklərdən əziyyət çəkən insanlar, xüsusilə xroniki xəstələr, həkimləri ilə məsləhətləşərək önləyici tədbirlər görsünlər.
Məsələn, vazomotor rinitdən əziyyət çəkən şəxslər xəstəliyin kəskinləşməsinin qarşısını almaq üçün müxtəlif tədbirlər görməlidirlər. Xüsusilə bitkilərin çiçəkləmə dövründə havaya yayılan tozcuqlara qarşı həssas olan şəxslər əlavə ehtiyat tədbirləri görməlidirlər. Bundan başqa, nevrozları və mədə və 12 barmaq bağırsağın xroniki xorası olan insanlarda da fəsil dəyişmələri zamanı xəstəliklərin kəskinləşməsi müşahidə olunur.
Bu səbəbdən, bu insanlar önləyici tədbirlər görməli, həkim tövsiyələrinə əməl etməli və müalicələrini vaxtında qəbul etməlidirlər. Fəsil dəyişmələri, iqlim dəyişikliyi və maqnit qasırğaları insan orqanizminə mənfi təsir edir, bu da sağlamlıq problemlərinə yol aça bilər. Xroniki xəstələr isə belə hallarda xüsusi diqqətli olmalı, həkimləri ilə məsləhətləşməli və müvafiq dərmanlarını vaxtında qəbul etməlidirlər".
Elnurə Kərimova
12:45 18.03.2025
Oxunuş sayı: 1207
