Bakıda “Talassemiyasız həyat naminə 20 il: Nadir xəstəliklər” mövzusunda konfrans keçirilib
Fevralın 8-də Bakıda “Talassemiyasız həyat naminə 20 il:
Nadir xəstəliklər” mövzusunda konfrans keçirilib.
Crossmedia.az xəbər verir ki, səhiyyə sahəsinin aparıcı mütəxəssislərinin,
dövlət rəsmilərinin, beynəlxalq səhiyyə təşkilatlarının nümayəndələrinin,
ekspertlərin və digərlərinin iştirak etdiyi konfransın əsas məqsədi talassemiya
və başqa nadir xəstəliklərin diaqnostikası, müalicəsi və profilaktikası sahəsində
əldə olunan nailiyyətləri müzakirə etmək, həmçinin perspektivləri müəyyənləşdirməkdir.
Konfransın elmi hissəsində çıxış edən professorlar Azər Kərimov
və Sərdar Ceylaner, hematoloq Səhər İsmayılova son 20 ildə Heydər Əliyev
Fondunun talassemiya ilə mübarizə istiqamətində həyata keçirdiyi layihələrdən bəhs
ediblər. Qeyd olunub ki, 2005-ci ildə keçirilən ilk tədbirdən sonra Fondun təşəbbüsü
ilə Bakıda Talassemiya Mərkəzi inşa edilib və 2009-cu il mayın 9-da istifadəyə
verilib. Bu mərkəz talassemiya xəstələrinin diaqnostikası və müalicəsində mühüm
rol oynayır. Bundan başqa, ölkəmizdə talassemiya və digər nadir xəstəliklərin
profilaktikası və müalicəsi sahəsində dövlət siyasətinin əhəmiyyətindan
danışılıb. Heydər Əliyev Fondunun bu istiqamətdə həyata keçirdiyi layihələrin
ölkənin səhiyyə sisteminə verdiyi töhfələr yüksək qiymətləndirilib.
Daha sonra konfrans sessiyalarla davam etdirilib.
Talassemiya və digər nadir xəstəliklərin diaqnostikası və müalicəsində müasir
yanaşmalar, genetik tədqiqatların əhəmiyyəti, donor qanının toplanması və
istifadəsi, həmçinin ictimai maarifləndirmə kampaniyalarının rolu ətrafında
müzakirələr aparılıb. Talassemiya və nadir xəstəliklərin qlobal miqyasda mövcud
vəziyyətindən, yeni müalicə metodlarından və beynəlxalq əməkdaşlığın əhəmiyyətindən
danışılıb, Azərbaycanın bu sahədə əldə etdiyi nailiyyətlər təqdir olunub.
12:05 08.02.2025
Oxunuş sayı: 4709
