Hesablama Palatası “Dövlət satınalmaları haqqında” qanuna uyğun olaraq 24 müqavilə bağlayıb
2024-cü ildə Hesablama Palatası “Dövlət satınalmaları haqqında” qanuna uyğun olaraq ümumi məbləği 399,2 min manat olan 24 müqavilə bağlayıb.
Crossmedia.az Hesablama Palatasına istinadən xəbər verir ki, bu, 2023-cü illə müqayisədə müvafiq olaraq 5 % az və 84,6 % çoxdur.
Məlumata görə, ötən il bağlanılmış müqavilələrin 379,5 min manat məbləğində 23-ü açıq tender, 19,7 min manat məbləğində 1-i isə kotirovka sorğusu tətbiq edilməklə çərçivə sazişi formasında bağlanılıb.
Hesabat dövründə 260,7 min manat məbləğində 16 müqavilədə rəqabətli satınalma metodları tətbiq edilib. Bunlar isə 1 il əvvələ nisbətən müvafiq olaraq 8,1 % az və 2 dəfə çoxdur.
2024-cü ildə satınalmaların 83,3 %-i ilin I yarısında, 16,7 %-i ilin II yarısında həyata keçirilib. Bu nisbətlər 2023-cü ildə müvafiq olaraq 75 % və 25 % təşkil edib.
Məbləğ olaraq isə satınalmalarda I yarımilin payı 58 %-dən 82,4 %-ə çatıb, II yarımilin payı isə 42 %-dən 17,6 %-ə düşüb.
Bu hesabat ilində də rəqabətli metodlar tətbiq olunmaqla keçirilmiş bütün satınalmalar elektron formada olub ki, bunu da İqtisadi Əməkdaşlıq və İnkişaf Təşkilatı (OECD) yaxşı göstərici hesab edir.
Ötən il bağlanılmış satınalma müqavilələri üzrə ümumilikdə 321,9 min manatlıq icra həyata keçirilib ki, bu da müqavilə məbləğinin 80,6 %-nə bərabərdir. Əvvəlki il bağlanılmış satınalma müqavilələri üzrə ümumilikdə 395,8 min manat (müqavilə məbləğinin 94,2 %-i) icra edilib.
2024-cü ildə qanunvericiliklə nəzərdə tutulmuş satınalma metodları tətbiq edilməklə bağlanılmış satınalma müqavilələri üzrə ümumilikdə ehtimal olunan qiymətə nisbətən 44,1 min manat vəsaitə qənaət edilib. Satınalmalarda orta qənaətlilik ehtimal olunan qiymətə münasibətdə 2,9 min manat olub ki, bu da 2023-cü illə müqayisədə 54,7 % azdır.
Ötən il ayrı-ayrı müqavilələr üzrə qənaətin ehtimal olunan qiymətə nisbəti 0,2-35,5 % arasında dəyişib (əvvəlki il 1,6-30,6 %).
13:21 04.02.2025
Oxunuş sayı: 3172
