“Onların icazəsi olmalıdır ki, Paşinyan sülh sazişini imzalasın”- Şərh
Ermənistanın xarici işlər naziri Ararat Mirzoyan yanvarın 30-da İrəvanda Gürcüstanın xarici işlər naziri Maka Boçorişvili ilə görüş keçirib.
O bildirib ki, Azərbaycanla münasibətlərin normallaşdırılması və sülh prosesində irəliləyiş məqsədilə aparılan danışıqlar davam edir. Həmçinin Ermənistanın mövcud mövqeyinin dəyişməz olduğunu da vurğulayıb.
Azərbaycan və Ermənistan arasındakı münasibətlər sözdə sülh yönümlü istiqamət göstərir. Lakin İrəvanın Bakıya qarşı sərgilədiyi siyasət heç də adekvat və məntiqli deyil. Belə ki, erməni rəsmilərinin Azərbaycan əleyhinə səsləndirdiyi bəzi fikirlər onların qeyri-dəqiqliyinin bariz nümunəsidir. Rəsmi Bakı hər zaman birtərəfli mövqe göstərərək öz siyasətini regionda və bütün dünya dövlətləri arasında nümayiş etdirib. Mirzoyanın səsləndirdiyi ifadələr isə heç də inandırıcı görünmür. Gələcək perspektivdə tərəflər arasında beynəlxalq danışıqlar və sülh məsələlərinin həlli müzakirə mövzusu kimi qalmağa davam edir.
Mövzu ilə bağlı Crossmedia.az-a politoloq Elçin Xalidbəyli münasibət bildirib.
Onun sözlərinə görə, Ermənistan sülh prosesi vasitəsilə siyasi manipulyasiyalar aparmaqla məşğuldur: “Bunun əsas iki səbəbi var. Birincisi, Ermənistan daxilində sülh sazişinin imzalanmasına kəskin şəkildə qarşı çıxan müxalif siyasi qüvvələr mövcuddur. Bu qüvvələrin önündə erməni kilsəsi dayanır. Eyni zamanda, rəsmi İrəvan hesab edir ki, sülh prosesi üzərində manipulyasiyalar ona yaxın perspektivdə daha əlverişli vəziyyət əldə etmək üçün əlavə vaxt qazandıra bilər. Buna görə də onlar bu manipulyasiyalarla prosesi uzatmağa çalışırlar. Bir tərəfdən sülh gedişatının növbəti mərhələsinə hazır olduqlarını bəyan edir, digər tərəfdən isə yeni müharibəyə hazırlığı intensivləşdirirlər. Fransa və Avropa ölkələrindən yeni, müasir hərbi texnika alırlar. Reallıq ondan ibarətdir ki, rəsmi İrəvan son iki ildə sülh prosesi ilə bağlı manipulyasiyalarla sadəcə vaxt qazandırmağa çalışır. Həqiqətdə isə rəsmi İrəvanın real sülh prosesinə bağlı qalmaq kimi bir niyyəti yoxdur. İkinci mühüm səbəb isə odur ki, Ermənistan artıq açıq şəkildə ABŞ-nin, Avropa İttifaqının (Aİ) və Fransanın Cənubi Qafqazdakı geosiyasi müstəmləkəsinə çevrilib. Bu səbəbdən, Ermənistan istəsə belə, ABŞ, Aİ-nin və Fransanın icazəsi olmadan Azərbaycanla sülh sazişi imzalamaq şansına malik deyil. Yəni rəsmi İrəvan nə zaman sülh sazişi imzalamaq qərarına gəlsə, ilk növbədə ABŞ-dən, Aİ-dən və Fransadan icazə almalıdır. Onların icazəsi olmalıdır ki, Paşinyan hakimiyyəti belə bir sazişin imzalanmasına cəsarət göstərə bilsin. Əks halda bu mümkün deyil”.
Politoloq qeyd edib ki, ABŞ-nin, Aİ-nin və Fransanın Cənubi Qafqazdakı maraqları isə, iki tərəf arasında sülh sazişinin imzalanması ilə kəskin ziddiyyət təşkil edir: “Əks təqdirdə, Ermənistanı dəstəkləyənlər Qərb üçün Cənubi Qafqazda yeni münaqişə başlamaq, növbəti regional müharibə yaratmaq və özlərinə yeni bir mövqe tapmaq imkanı yarana bilər. Buna görə də Qərb siyasi dairələri sülh prosesinə deyil, vəziyyətin daha da gərginləşməsinə, hərbi qarşıdurmanın artmasına və silahlı toqquşmaların baş verməsinə çalışırlar. Bu baxımdan, Ermənistanın sülh prosesinə bağlı verdiyi bəyanatlar sadəcə manipulyasiyadır. Onlar başqalarını aldadırmış kimi görsənsələr də, erməni davranışları artıq hər kəsə məlumdur və heç kim Ermənistanın manipulyativ açıqlamalarına əhəmiyyət vermir. Buna görə də yaxın gələcəkdə sülh danışığının yekunlaşması ehtimalı inandırıcı deyil. Bu prosesin yəni sülh sazişinin imzalanması üçün hər iki tərəf arasında böyük ölçüdə ABŞ və Qərbin Cənubi Qafqazdakı geosiyasi maraqları ilə üst-üstə düşməsi gözlənilməlidir. Yəqin ki, Ermənistan bir mərhələdə Qərbdən sülh sazişini imzalamaq üçün icazə almalı olacaq. Yalnız bundan sonra Ermənistan sülh sazişi imzalayacaq”.
Fidan Hacızadə
11:06 31.01.2025
Oxunuş sayı: 4334
