Azərbaycan səhiyyə sistemində yenilik: Həkim perspektivləri açıqladı
Səhiyyə Nazirliyinin Tibb müəssisələrinin akkreditasiyası və keyfiyyətə nəzarət mərkəzi İdarə Heyətinin sədri vəzifələrini müvəqqəti icra edən Şərafət İsmayılova Milli Məclisdə keçirilən “İlkin səhiyyə xidməti: mövcud vəziyyət, görülən işlər, problemlər və onların həlli yolları” mövzusunda dinləmədə deyib ki, Azərbaycanda teletibb xidmətləri ilə bağlı qaydalar hazırlanır.
Onun sözlərinə görə, həmin qaydalar tətbiq ediləndən sonra hər kəs üçün əlçatan olacaq: "Hazırda teletiblə bağlı qanunvericilikdə müəyyən tənzimləmələrə ehtiyac var”.
Çağdaş dövrümüzdə bütün sferalarda inkişaf özünü əks etdirir. Bu səhiyyə sahəsində də müşahidə olunur. Teletibb xidməti zamanı mətn, şəkil və səsdən istifadə edərək həkim və xəstə arasında istədiyiniz ünsiyyət qurulur. Müasir texnoloji əsaslarla diaqnoz video rabitə vasitəsi ilə həyata keçirilir.
Teletibbin müsbət xüsusiyyətləri də mövcuddur. Belə ki, bunu tibb müəssisələrində gözləmə növbələri ənənəvi müayinəyə nisbətən azalmış olur. Həmçinin, səyahət xərclərini aradan qaldırır, geniş ictimaiyyət üçün mövcuddur, tək Azərbaycanda deyil, eyni zamanda dünyanın müxtəlif ölkələrində həkimlərdən müayinədən keçmə imkanı olur və.s başqa faydalı məqamlar mümkündür.
Məsələ ilə bağlı Crossmedia.az-a açıqlama verən həkim Adil Qeybulla bildirib ki, əgər dünyada mövcud olan modellər əsasında yaradılıb şəffaf şəkildə həyata keçirilərsə, bu metod müsbət nəticə verəcək: “Yox, əgər yenə də “Azərbaycan sayağı” bir sistem qurulacaqsa, bunun effekti minimal olacaq. Dünyada akreditasiya sistemi mövcuddur – istər tibbi işçilər, istər tibb müəssisələri, istərsə də tibbi məhsullar üçün. Ümumilikdə bütün tibbi fəaliyyət növlərinin reyestri olmalıdır və bu, davamlı bir sistem şəklində işləməlidir”.
Həkimin sözlərinə görə, əsas problem odur ki, hazırda tətbiq olunan sertifikatlaşdırma sistemləri və qaydalar daha çox korporativ maraqlara xidmət edir: “Məsələn, apteklərin həddindən artıq çox açılması, onların uyğun şəraitə malik olub-olmaması, dərman vasitələrinin saxlanma tələblərinə riayət olunub-olunmaması və ümumilikdə apteklərin fəaliyyət mexanizmi dünyadakı standartlardan xeyli fərqlidir. Bu da nəticədə sistemin səmərəsizliyinə və problemlərin davam etməsinə səbəb olur”.
Fidan Hacızadə
16:24 30.01.2025
Oxunuş sayı: 13306
