KTMT Azərbaycanla Ermənistan arasında sülhə töhfə verə bilər: Düstur budur!
Kollektiv Təhlükəsizlik Müqaviləsi Təşkilatının (KTMT) Birləşmiş Qərargah rəisi general-polkovnik Andrey Serdyukov jurnalistlərə açıqlamasında regionda vəziyyətin qeyri-sabit qaldığını və sülh prosesinin davam etdiyini bildirib. O, Ermənistan-Azərbaycan sərhədinin demarkasiyasını və sülh müqaviləsinin hazırlanmasını bu prosesin əsas elementi kimi vurğulayıb. Lakin KTMT-nin bu məsələdə nə dərəcədə səmimi olduğu sual altındadır. Ermənistanın sülhə mane olan addımları təşkilat üzvləri tərəfindən açıq şəkildə dəyərləndirilmədiyi halda, KTMT-nin bu prosesdə hansı rolu oynaya biləcəyi də müzakirə mövzusudur. Bununla yanaşı, Ermənistanın öz hərbi siyasəti ilə KTMT-ni problemlərlə üz-üzə qoyması, təşkilatın narahatlığına səbəb olur. Bəs KTMT-nin sülh prosesinə təsiri nə dərəcədə realdır və bu hərbi blokun iştirakı müsbət nəticə verə bilərmi?
Mövzu ilə bağlı politoloq Xəyal Bəşirov Crossmedia.az saytına açıqlama verib:
“KTMT-nin qərərgah rəisi səsləndirdiyi bu fikirlərdə gərginliyin kimdən qaynaqlandığına da toxunsa yaxşı olardı. Çünki onlar real sülh tərəfdarını da, bölgədə gərginlik yaradanı da yaxşı tanıyır. Odur ki, Ermənistanın sülh prosesinə mane olan dövlət olduğunu dilə gətirə bilərdilər. Çünki biz onlardan dəfələrlə Ermənistana münasibətdə açıq mövqe sərgiləməsinin şahidi olmuşuq. Regionda baş verən proseslərin KTMT-nin təsir dairəsinə aid olmadığını həmin o təşkilatın yaradıcı rəhbəri olan Rusiya dəfələrlə bildirib. Ona görə düşünürəm ki, Ermənistanın bu məsələdə addımları KTMT-ə üzv olan dövlətlər tərəfindən də dəyərləndirilməlidir. Ermənistan atdığı addımlarla özünü yenidən müharibə tərəfinə çevirməyə çalışırsa bu KTMT-nin maraqlarına ziddir. Ermənistan bu addımı ilə üzv olduğu KTMT-ni də problemlərlə üz-üzə qoyur”.
Analitik sözlərinə görə, rusiyalı generalın səsləndirdiyi bu fikirlər gələcəkdə Ermənistanın KTMT üçün problemlər yarada biləcəyi narahatlığından irəli gəlir: “Eyni zamanda təşkilat üzvlərinin ümumi narahatlığı Ermənistan ərazisində müxtəlif dövlətlərin, xüsusən də KTMT-yə rəqib olan dövlətlərin qüvvələrini yerləşdirməsi ilə bağlıdır. Sülh prosesində KTMT Ermənistanın silahlandırılmasına qarşı çıxaraq dolayı yolla sülhə müsbət təsir göstərə bilər”.
Ayhan Ağarzayev
16:12 30.01.2025
Oxunuş sayı: 10466
