Sağlamlıq

Gec yatmaq şəkərli diabet riskini artırır

Mütəxəssislər gecə saat 12-dən sonra yatmağın şəkərli diabet riskini artırdığını bildiriblər.

Crossmedia.az xarici KİV-ə istinadən xəbər verir ki, tibb elmləri namizədi Aleksandr Kalinkin Rusiyanın "Rossiya 1" telekanalında yayımlanan "Ən vacib haqqında" proqramında bu barədə danışıb.

Onun sözlərinə görə, gec yatmaq şəkərli diabet riskini 45% artırır. Mütəxəssis yatmaq üçün ən uyğun vaxtın 22:00-23:00 arasında olduğunu qeyd edib. "Əgər insan gecə saat 12-dən sonra yatmağa gedirsə, şəkərli diabet riski əhəmiyyətli dərəcədə artır", - deyə o bildirib.

Həkim Aleksandr Myasnikov da sağlam yuxu rejiminə əməl etməyin vacibliyini vurğulayıb. "Həftə sonları da daxil olmaqla, hər gün eyni saatda yatmaq və oyanmaq sağlamlıq üçün əsas şərtdir. Erkən oyanmaq axşamlar 'yuxu təzyiqi' yaradır və insan daha tez və rahat yuxuya gedir", - deyə o qeyd edib.

Bundan əlavə, Myasnikov şəkərli diabetə səbəb olan səhər yeməyi vərdişlərinə də diqqət çəkib. Onun sözlərinə görə, irmik sıyığı ilə səhər yeməyi qəbul etmək artıq çəkiyə və diabetə gətirib çıxara bilər.

Mütəxəssislər sağlam həyat tərzi üçün yuxu rejiminin qorunmasını və balanslı qidalanmanı tövsiyə edirlər.

Fatimə Məmmədova