“Hər bir həkimin fəaliyyət lisenziyası olmalı və akkreditasiyadan keçməlidir”
Səhiyyə Nazirliyi plastik cərrahlarla bağlı çağırış edib. Səhiyyə Nazirliyindən verilən məlumata görə, Azərbaycan Respublikasının ərazisində praktik tibb fəaliyyəti ilə məşğul olan plastik cərrahlar peşə fəaliyyətinin qanunauyğunluğunu təsdiq edən sənədlərinin notariat qaydasında təsdiq edilmiş surətlərini (baza ali tibb təhsili, diplomdan sonrakı təhsilə aid bütün sənədlər, əmək kitabçası, tibbi fəaliyyət ilə məşğul olmağa buraxılma barədə şəhadətnamə, sertifikasiya şəhadətnaməsi və s.) 2025-ci il 31 yanvar tarixinədək Azərbaycan Respublikasının Səhiyyə Nazirliyinə şəxsən təqdim etməlidirlər. Məlumata görə hüquq-mühafizə orqanlarının da iştirak edəcəyi bu yoxlamadan üzüağ çıxan plastik və estetik cərrahlara sənəd veriləcək. Bu sənədi əldə edə bilməyən cərrahların fəaliyyətinə icazə verilməyəcək.
Mövzu ilə bağlı tibb elmlər doktoru, professor Adil Qeybulla Crossmedia.az-a açıqlama verib. Professorun sözlərinə görə, Səhiyyə Nazirliyinin etdiyi çağırış yaranan situasiya ilə bağlıdır:
“Bütövlükdə, hər bir həkimin fəaliyyət lisenziyası olmalıdır və akkreditasiyadan keçməlidir. Eyni zamanda, sertifikasiya imtahanları ləğv edilməlidir. Akkreditasiyada həkimin təhsili, diplomunun olub-olmaması, həmçinin onun bu sahə üzrə çalışma səlahiyyətinin müəyyən olunması önəmlidir. Bütün bunlar akkreditasiya prosesi zamanı tənzimlənir və həkimə lisenziya verilir.
Lisenziya 3, 5 və ya 7 illik olur. Bu müddətlər ölkələrə görə fərqlənir. Vaxt bitdikdə isə bütün sənədlər yenidən nəzərdən keçirilir. Həkimin inkişafı, həyata keçirdiyi əməliyyatların sayı, təcrübə mübadiləsində iştirakı və konfranslarda iştirakı əsas götürülərək ona lisenziya verilir. Düşünürəm ki, plastik cərrahlarla bağlı verilən bu qərarın səbəbi də məhz akkreditasiya sisteminin aparılmaması ilə bağlıdır”.
Fidan Hacızadə
06:30 15.01.2025
Oxunuş sayı: 3941
