Sağlamlıq

Dietoloq ən faydalı balıq növlərini açıqlayıb

Bəzi balıq növləri sağlamlıq üçün xüsusilə faydalıdır. Bu barədə həkim-qastroenteroloq və diyetoloq Elvira Beleva məlumat verib.

Crossmedia.az bildirir ki, onun fikirlərini UfaTime.ru yayımlayıb.

Beleva ən faydalı balıqlardan biri kimi somonu qeyd edib. Bu balıq omeqa-3 yağ turşuları, B qrupu vitaminləri və keyfiyyətli zülalla zəngindir. Skumbriya da sağlamlıq üçün olduqca faydalıdır — bu balıq omeqa-3, D və B12 vitaminlərinin mənbəyidir və ürək sağlamlığına müsbət təsir göstərir. Oxşar xüsusiyyətlərə malik olan siyənək də diyetoloqun tövsiyə etdiyi balıqlardandır.

Eyni zamanda, Beleva vurğulayıb ki, vəhşi tuna balığı zülal və omeqa-3 mənbəyi olsa da, tərkibində civə ola biləcəyi üçün onu ölçülü şəkildə yemək məsləhətdir. Sardina balığının da faydaları böyükdür — bu balıq omeqa-3, zülal, B qrupu vitaminləri ilə zəngindir və çoxlu qiymətli minerallar, o cümlədən kalsium ehtiva edir. Göy qurşağı alabalığı omeqa-3 və D vitamini ilə zəngindir, hek balığı isə B qrupu vitaminləri, fosfor və selen mənbəyidir. Beleva balığın hazırlanma üsulunun da önəmli olduğunu bildirib və qızartmadan çəkinməyi tövsiyə edib.

Gültac Mehdizadə