ABŞ səfiri Polşada zorakılıq təhlükəsi barədə xəbərdarlıq edib
ABŞ-nin Polşadakı səfiri Tomas Rouz ölkədə Konstitusiya Tribunalı ətrafında yaranan siyasi gərginlik fonunda tərəfləri zorakılığa səbəb ola biləcək addımlardan çəkinməyə çağırıb.
Crossmedia.az xəbər verir ki, diplomat bu barədə "X" sosial şəbəkəsindəki hesabında məlumat yayıb.
Səfir oktyabrın 30-da Konstitusiya Tribunalında baş verən hadisələri ciddi adlandıraraq hökumətin dövlət səlahiyyətlərindən istifadəsi və konstitusion qurumun müstəqilliyi ilə bağlı qarşıdurmanın yarandığını bildirib.
Rouz tərəflərin hadisələrlə bağlı fərqli mövqelər səsləndirdiyini və Tribunalın qarşısına toplaşan minlərlə insanın vəziyyəti daha da gərginləşdirə biləcəyini vurğulayıb.
"Amerika Polşanın yanındadır. Onun daxili işlərinə müdaxilə etmək və ya hökm vermək bizim vəzifəmiz deyil. Bizi narahat edən dost və müttəfiqimiz olan bu ölkənin sabitliyi, təhlükəsizliyi və demokratik gələcəyidir", – deyə diplomat qeyd edib.
ABŞ səfiri hökumət nümayəndələrini, hüquq-mühafizə orqanlarını və etirazçıları təmkinli davranmağa, zorakılığa və gərginliyin artmasına səbəb ola biləcək hərəkətlərdən uzaq durmağa çağırıb.
Rouz Polşanın sabitliyinin və gələcəyinin ölkə vətəndaşlarından, dövlət institutlarından və qanunun aliliyinə sadiqlikdən asılı olduğunu bildirib.
10:13 31.10.2026
Oxunuş sayı: 55
