Livan ABŞ-dən İsrailin hücumlarını dayandırması üçün müdaxilə istəyib
Livan İsrailin ölkənin cənubundakı yaşayış məntəqələrinə hücumlarını dayandırması və razılaşmanın şərtlərinə əməl etməsi üçün ABŞ-dən müdaxilə etməsini istəyib.
Crossmedia.az xəbər verir ki, bu barədə Livan Prezident Administrasiyasının yaydığı məlumatda bildirilib.
Livan Prezidenti Cozef Aun ABŞ-nin dövlət katibi Marko Rubio ilə telefon danışığı zamanı ölkədə və regionda mövcud vəziyyəti müzakirə edib.
Aun Rubiodan İsrailə çərçivə sazişinin müddəalarına əməl etməsi üçün təzyiq göstərməyi xahiş edib. O, həmçinin torpaqların təmizlənməsi və qazılması əməliyyatlarının dayandırılmasını, fermerlərin əkin sahələrinə çıxışının təmin edilməsini və onların hədəfə alınmamasını tələb edib.
Livan Prezidenti bildirib ki, ölkənin ordusu və təhlükəsizlik qüvvələri silahlı nümayişlərin qarşısının alınması, silah və sursatın müsadirə edilməsi, eləcə də qaçaqmalçılıqla mübarizə istiqamətində üzərlərinə düşən vəzifələri tam yerinə yetirirlər.
Aun məhkəmə orqanlarının onlara göndərilən bütün işləri araşdırdığını vurğulayıb. O, pozuntulara görə məsuliyyət daşıyan şəxslərə qarşı “heç bir güzəştə gedilməyəcəyini” qeyd edib.
Məlumata görə, İsrail martın əvvəlindən Livanın cənubuna hücumlarını davam etdirir. Bu hücumlar nəticəsində 4 300-dən çox insanın öldüyü, bir milyondan çox insanın isə evlərini tərk etmək məcburiyyətində qaldığı bildirilir.
İyun ayında Beyrut və Təl-Əviv ABŞ-nin vasitəçiliyi ilə çərçivə sazişi imzalayıblar. Saziş İsrail qüvvələrinin Livan ərazisindən mərhələli şəkildə çıxarılmasını və digər müddəalarla yanaşı, “Hizbullah”ın tərksilah edilməsini nəzərdə tutur.
06:30 16.10.2026
Oxunuş sayı: 73
