Deputat: Azərbaycan–Laos münasibətləri strateji əməkdaşlığın dərinləşməsi üçün yeni imkanlar yaradır
Azərbaycanın çoxşaxəli xarici siyasəti çərçivəsində Cənub-Şərqi Asiya ölkələri ilə əlaqələrin genişləndirilməsi mühüm əhəmiyyət daşıyır. Bu baxımdan, Azərbaycan–Laos münasibətləri tarixi dostluq, qarşılıqlı hörmət və beynəlxalq platformalarda əməkdaşlıq prinsipləri əsasında inkişaf edir. Uzun illər ərzində formalaşan ikitərəfli əlaqələr son dövrdə siyasi dialoqun intensivləşməsi ilə yeni məzmun qazanır. Xüsusilə yüksək səviyyəli qarşılıqlı səfərlər və diplomatik təmaslar iki ölkə arasında əməkdaşlığın daha geniş sahələri əhatə etməsinə imkan yaradır. İqtisadiyyat, ticarət, kənd təsərrüfatı, təhsil, turizm və investisiya sahələri qarşılıqlı faydalı tərəfdaşlıq üçün perspektivli istiqamətlər kimi çıxış edir. Eyni zamanda, parlamentlərarası əlaqələr və beynəlxalq təşkilatlar çərçivəsində qarşılıqlı dəstək siyasi münasibətlərin möhkəmlənməsinə töhfə verir. Laos Prezidentinin Azərbaycana rəsmi səfəri də mövcud əməkdaşlığın inkişafı baxımından əlamətdar hadisə kimi qiymətləndirilir. Səfər çərçivəsində əldə olunan razılaşmalar ikitərəfli münasibətlərin konkret layihələr və təşəbbüslərlə zənginləşdirilməsi üçün yeni imkanlar açır. Bəs Azərbaycan–Laos münasibətlərinin mövcud potensialı hansı istiqamətlərdə reallaşa bilər və bu əməkdaşlıq gələcəkdə hansı nəticələri vəd edir?
Mövzu ilə bağlı Azərbaycan Respublikası Milli Məclisinin deputatı Məzahir Əfəndiyev Crossmedia.az-a açıqlama verib.
Deputat bildirib ki, iki ölkə arasında tarixi dostluq bağları uzunillik inkişaf yoluna malikdir:
"Azərbaycan və Laos arasında dostluq münasibətlərinin təməli keçən əsrin 80-ci illərində Laos prezidentinin ölkəmizə səfəri ilə qoyulub, rəsmi diplomatik əlaqələr isə 1995-ci ilin 22 may tarixində qurulub. İki ölkənin tarixən oxşar inkişaf yolu keçməsi, müstəqillik uğrunda mübarizəsi və inkişaf etməkdə olan dövlətlər kimi beynəlxalq müstəvidə mövqe qazanmaq səyləri onları əməkdaşlığa daha da yaxınlaşdırıb. İkitərəfli münasibətlərin əsasını qarşılıqlı hörmət və bərabərlik prinsipləri təşkil edir. BMT, Qoşulmama Hərəkatı və digər beynəlxalq təşkilatlar çərçivəsində ölkələrimiz bir-birinin təşəbbüslərini daima dəstəkləyir. Xüsusilə, Azərbaycanın 2019-2023-cü illərdə Qoşulmama Hərəkatına uğurlu sədrliyi dövründə yürütdüyü prinsipial siyasət Laos tərəfindən yüksək qiymətləndirilib".
M.Əfəndiyev parlamentlərarası və hökumətlərarası səviyyədə həyata keçirilən təcrübə mübadilələrinə və praktiki əməkdaşlıq addımlarına toxunub:
"Parlamentlərarası dostluq qruplarının fəaliyyəti və ekspertlər səviyyəsində aparılan müzakirələr praktiki əməkdaşlığın hüquqi və institusional əsaslarını formalaşdırıb. Nümunə kimi, Laos Xalq Demokratik Respublikasının nümayəndə heyəti 2024-cü ilin may ayında Dayanıqlı İnkişaf Məqsədlərinin (DİM) icrası istiqamətində Könüllü Milli Hesabatların hazırlanması prosesində təcrübə mübadiləsi məqsədilə Azərbaycanda rəsmi səfərdə olub. BMT-nin Bakı ofisində Laos XİN-in Beynəlxalq təşkilatlarla əməkdaşlıq şöbəsinin müdiri Daovi Vonqxayın rəhbərlik etdiyi nümayəndə heyəti ilə İqtisadiyyat Nazirliyinin əlaqələndirməsi ilə keçirilən görüşdə DİM-lərin icrasında Parlamentin rolu və maraqlı tərəflər arasında əməkdaşlığın gücləndirilməsi istiqamətində vacib müzakirələr aparılmışdı".
Parlamentari son dövlət səfərinin ikitərəfli əlaqələrə yeni təkan verdiyini xüsusi vurğulayıb:
"Laos Xalq Demokratik Respublikasının Prezidenti Thonqlun Sisulitin Azərbaycana rəsmi dövlət səfəri mövcud münasibətlərin yeni müstəvidə inkişaf edəcəyini deməyə tam əsas verir. Prezident İlham Əliyevin bəyan etdiyi kimi, bu səfər ikitərəfli əməkdaşlığı daha da dərinləşdirəcək. Dövlət başçısı iqtisadiyyat, ticarət, təhsil (sovet dövründə Laostan olan tələbələrin Azərbaycanda təhsil alması ənənəsinin bərpası), kənd təsərrüfatı, turizm, investisiya və mina təhlükəsi ilə mübarizə sahələrində əməkdaşlığın müsbət dinamikasını qeyd etdi. Səfər çərçivəsində imzalanan Birgə Bəyanat, azad viza rejimi və kənd təsərrüfatı sahəsində əməkdaşlığa dair sənədlər gələcək inkişaf üçün əlverişli zəmin yaradıb".
Mütəxəssis sonda qeyd edib ki, Azərbaycan–Laos münasibətləri regionlararası əməkdaşlığın uğurlu modelidir:
"Müxtəlif mədəniyyətlərə və coğrafiyalara mənsub olmalarına baxmayaraq, iki ölkə arasında formalaşmış etimad Azərbaycanın xalqlar arasında sülh və sabitliyə verdiyi dəyərin bariz nümunəsidir. Prezident İlham Əliyevin rəhbərliyi ilə həyata keçirilən çoxvektorlu xarici siyasət Azərbaycanın Asiya-Sakit okean regionu, o cümlədən Laos ilə əlaqələrinin daha da dərinləşəcəyini və strateji tərəfdaşlığın möhkəmlənəcəyini göstərir".
Fatimə Cabbarlı
17:30 14.10.2026
Oxunuş sayı: 60
