Avropa birinciliyində 15 medal qazanmış ağırlıqqaldıranlarla görüş keçirilib
Azərbaycan Ağırlıqqaldırma Federasiyasının prezidenti Kamran Nəbizaə Kosovonun paytaxtı Priştinada keçirilmiş Avropa birinciliyində 15 medal qazanmış komanda üzvlərini qəbul edib.
Crossmedia.az xəbər verir ki, görüşdə AAF-ın vitse-prezidenti Firdovsi Umudov, yığmanın məşqçiləri, idmançılar və komandanın həkim heyəti iştirak ediblər.
Atletləri salamlayan Kamran Nəbizadə bildirib ki, Azərbaycanda idmanın inkişafı hər zaman prioritet istiqamətlərdən olub.
O qeyd edib ki, Prezident İlham Əliyev tərəfindən idmançıların, xüsusilə də yeniyetmələrin sağlam mühitdə formalaşmasına böyük həssaslıqla yanaşılır. Müzəffər Ali Baş Komandanın aşıladığı qalib ruhun daşıyıcıları məhz bu gənclər və yeniyetmələrdir.
Daha sonra Avropa birinciliyindəki çıxışına görə hər bir idmançıya təşəkkürünü bildirən Kamran Nəbizadə onlardan gələcəkdə daha böyük uğurlar gözlədiyini diqqətə çatdırıb:
"Medal qazanan və Avropa birinciliyində iştirak edən hər bir idmançı ilə qürur duyuruq. Elə idmançılar oldu ki, onları medaldan 1-2 kq çəki ayırdı. Bu gün qazanılan nəticə bizi sevindirir, amma əlbəttə ki, inkişaf etməliyik, daha çox çalışmalıyıq. Burada məşqçilərimizin üzərinə böyük məsuliyyət düşür. Onların seçimi, onların işi düzgün qurması nəticəsini "körpücük"də göstərir. Deməli, çalışdıqca kəmiyyəti keyfiyyətə çevirmək mümkün olur. Əlbəttə, bütün bu uğurları nizam-intizam olmadan əldə etmək mümkün deyil. Bu baxımdan intizamlı kollektivin təşkilinə görə Firdovsi Umudova xüsusi təşəkkürümü bildirirəm. Hər birinizə gələcək yarışlarda uğurlar və yeni qələbə sevinci arzulayıram."
Firdovsi Umudov bildirib ki, Avropa birinciliyinə hazırlıq müddətində federasiya tərəfindən komanda üzvlərinə bütün şərait yaradılmışdı. Sevindirici haldır ki, idmançılar da bu şəraitin müqabilində etimadı doğrultdu:
"Bu yarış məşqçi heyətimizin seçiminin də doğruluğunu isbat etdi. Yığmanın heyətinə öz çəkisində lider olan və ən əsası nəticələri ilə Avropa birinciliyində rəqabət apara biləcək idmançılar cəlb olunmuşdular. Nizam-intizam məsələsi bizim üçün həmişə öndə gəlib. Komandadaxili ab-hava qaydasında olmasa, orada uğurdan söhbət gedə bilməz. Ona görə də hər kəs ümumi qaydalara riayət etməli və bir amal ətrafında birləşməlidir. Qarşıda bizi böyük yarışlar gözləyir. Etdiklərimizi unudub, edəcəklərimizə fokuslanmalıyıq. Çünki bizim beynəlxalq arenalarda uğurlu çıxışımız bayrağımızın dalğalanması, himnimizin səslənməsi deməkdir".
Daha sonra yığma komandanın baş məşqçisi Sərdar Həsənov Avropa birinciliyinin yekunları ilə bağlı danışıb:
"İdmançıların hər birindən medal gözləyirdik. Çünki yaxşı hazırlıq keçmişdik. Bu müddətdə yaradılan şəraitə görə təşəkkürümü bildirirəm. Çünki hazırlıq yarışdan daha vacibdir. Çalışacağıq ki, qarşıdakı yarışlarda da nəticələrimizi inkişaf etdirək".
Görüşün sonunda Kamran Nəbizadə komanda üzvləri ilə xatirə fotosu çəkdirib.
15:47 01.09.2026
Oxunuş sayı: 50
