Qara dənizdə azərbaycanlıların olduğu gəmi batıb: Ölən və itkin düşənlər var
Qara dənizdə Azərbaycan və Ukrayna vətəndaşlarının olduğu yük gəmisi pilotsuz uçuş aparatlarının hücumuna məruz qalaraq batıb. Hadisə nəticəsində bir nəfər ölüb, üç nəfər itkin düşüb.
Crossmedia.az bu barədə "euro news" a istinadən xəbər verir ki, Bolqarıstanın “Novinite” nəşri Rumıniya Dəniz Administrasiyasının məlumatına istinadən bu barədə xəbər yayıb.
Bildirilib ki, hadisə oktyabrın 23-də Rumıniyanın Konstansa limanından təxminən 13 dəniz mili məsafədə baş verib.
“Khoryv” adlı gəminin göyərtəsində 13 ekipaj üzvü olub. Onlardan 10-u Ukrayna, üçü isə Azərbaycan vətəndaşıdır.
Rumıniya Dəniz Administrasiyasının açıqlamasına əsasən, axtarış-xilasetmə əməliyyatı zamanı doqquz dənizçi sağ xilas edilib, bir nəfərin meyiti sudan çıxarılıb. Digər üç ekipaj üzvünün axtarışları davam etdirilir.
Əlverişsiz hava şəraiti və məhdud görünüş səbəbindən helikopterlə xilasetmə əməliyyatının həyata keçirilməsi mümkün olmayıb.
İlkin məlumatlara görə, gəmi bir neçə pilotsuz uçuş aparatının hücumuna məruz qalıb. Lakin hadisənin dəqiq səbəbi ilə bağlı araşdırmalar davam edir.
Qeyd edək ki, son həftələr Qara dənizdə Rumıniya və Bolqarıstan sahilləri yaxınlığında ticarət gəmilərinə dron hücumları barədə məlumatlar yayılıb.
15:10 23.10.2026
Oxunuş sayı: 78
