Xarici xəbərlər

Peskov: Ukraynada sülh üçün təhlükəsizlik məsələsi həll olunmalıdır

Rusiya Prezidentinin mətbuat katibi Dmitri Peskov Ukrayna münaqişəsinin sülh yolu ilə nizamlanması üçün Rusiya və Ukraynanın təhlükəsizliyinin təmin edilməsinin vacib olduğunu bildirib.

Crossmedia.az xəbər verir ki, TASS agentliyi bu barədə məlumat yayıb.

Peskovun sözlərinə görə, Avropanın təhlükəsizlik arxitekturasını digər iştirakçılar olmadan müzakirə etmək mümkün deyil. Bununla belə, ilkin müzakirələrin Rusiya, ABŞ və Ukrayna formatında aparılması nəzərdə tutulur.

Kremlin sözçüsü vurğulayıb ki, həm Rusiyanın, həm də Ukraynanın təhlükəsizliyi sülh prosesinin əsas məsələlərindən biridir.

“Təhlükəsizlik məsələsi Rusiya və Ukrayna üçün sülh yolu ilə nizamlanmanın ən mühüm hissələrindən biridir. Bu olmadan hərtərəfli həll mümkün deyil”, – deyə Peskov bildirib.

O, həmçinin Moskvanın beynəlxalq münasibətlərdə heç bir ölkənin digərinə dünya nizamı ilə bağlı baxışlarını qəbul etdirməməsi mövqeyindən çıxış etdiyini söyləyib.

Peskov Rusiya Prezidenti Vladimir Putin, ABŞ Prezidenti Donald Tramp və Çin lideri Si Cinpin arasında mümkün görüşün əhəmiyyətinə də toxunub. Bununla belə, o, belə bir görüşün “yeni Yalta” kimi qiymətləndirilməsinin doğru olmadığını bildirib.

Kremlin nümayəndəsi əlavə edib ki, Vladimir Putin gələn həftə keçiriləcək Qaz İxrac Edən Ölkələr Forumunun (GECF) tədbirlərinə və Rusiya–Afrika sammitinə hazırlaşır.

Peskovun sözlərinə görə, Rusiya beynəlxalq münasibətlərdə qarşılıqlı hörmət və faydalı əməkdaşlıq prinsiplərinə üstünlük verir.