Qazaxıstanda etnomədəni birliklərin iştirakı ilə dialoq platforması keçirilib
Qazaxıstanın Kostanay şəhərində fəaliyyət göstərən "Birlik" İctimai Birliyinin nümayəndələri “Bir el – bir tale” adlı mədəni-maarifləndirici tədbir çərçivəsində Lisakovsk şəhərinə səfər ediblər.
Crossmedia.az xəbər verir ki, səfər zamanı birliyin nümayəndələri Lisakovsk şəhəri akiminin müavini Saltanat Şaldıbayevayla görüşüblər.
Bununla yanaşı Lisakovsk Texniki Kollecində “Köklər, ənənələr, birlik: Kostanay torpağında azərbaycanlılar” adlı dialoq platforması keçirilib. İctimaiyyət nümayəndələrinin, gənclərin və etnomədəni birliklərin təmsilçilərinin qatıldığı müzakirələrdə mədəni əlaqələrin əhəmiyyəti ön plana çıxıb.
“Birlik” İctimai Birliyinin sədri, Qazaxıstan Xalq Şurasının üzvü Rafael Hacıbalayev “Ənənələrdə köklər, əməkdə güc, gələcək gənclərdədir” mövzusunda çıxış edib.
Tədbir xalqlar arasında həmrəyliyin möhkəmləndirilməsi, milli ənənələrin yaşadılması və müxtəlif etnosların nümayəndələri arasında qarşılıqlı anlaşmanın inkişafına yönəlib.
14:35 23.10.2026
Oxunuş sayı: 48
