Şimali Kipr sahillərindəki bərə qəzasında ölənlərin sayı 8-ə çatdı
Şimali Kipr sahillərində sərnişin bərəsinin çevrilməsi nəticəsində azı 8 nəfər həlak olub, 20-yə yaxın insan isə itkin düşüb.
Crossmedia.az xəbər verir ki, “Reuters” bu barədə məlumat yayıb.
Məlumata görə, göyərtəsində 267 nəfərin olduğu ikikorpuslu bərə bazar günü Girnə liman şəhərinin yaxınlığında su alaraq çevrilib. Sərnişinlərin bir qismi çevrilmiş gəminin gövdəsindən yapışaraq xilasetmə qüvvələrini gözləyib. Onlar ərazidən keçən gəmilərin və sahil mühafizəsinin köməyi ilə xilas ediliblər.
Hazırda Türkiyədən gələn dalğıclar da axtarış-xilasetmə əməliyyatına cəlb olunub. Gəminin dənizin 500 metrdən çox dərinliyində dibə oturduğu bildirilir. Onun içərisində insanların qalıb-qalmadığı hələlik məlum deyil.
15:53 31.08.2026
Oxunuş sayı: 55
