“Fenerbahçe”dən Acun Ilıcalının loja tələbi ilə bağlı etiraz
Fenerbahçe Futbol A.Ş. Acun Ilıcalının 217 nömrəli lojanın istifadəsi ilə bağlı məhkəmə qərarına etiraz edib.
Crossmedia.az xəbər verir ki, “Fenerbahçe” bu barədə açıqlama yayıb.
Klubun açıqlamasında bildirilib ki, Acun Ilıcalı 27 iyul 2026-cı ildə 217 nömrəli lojanın istifadəsinin ona verilməsi üçün İstanbul Anadolu 9-cu İstehlak Məhkəməsinə müraciət edərək təminat tədbiri tələb edib.
Fenerbahçe Futbol A.Ş. ilə Acun Ilıcalı arasında sözügedən lojadan istifadəyə dair hər hansı müqavilənin olmadığı qeyd edilib.
Məlumata görə, İstanbul Anadolu 9-cu İstehlak Məhkəməsi iyulun 27-də Ilıcalının təminat tədbiri ilə bağlı tələbini rədd edib.
Klub iddia edib ki, Ilıcalının bu qərardan apellyasiya şikayəti verməsindən sonra Fenerbahçenin qanuni cavab müddəti gözlənilmədən qərar qəbul edilib.
Açıqlamada İstanbul Regional Apellyasiya Məhkəməsinin 18-ci Mülki Kollegiyasında müvəqqəti heyət tərəfindən hüquqi qüvvəsinin olmadığı, tərəfləri, imzası və mövzusu göstərilməyən A4 formatlı sənədə əsaslanılaraq təminat tədbirinin qəbul edildiyi bildirilib.
Fenerbahçe bu qərarın hüquqa və məhkəmə təcrübəsinə zidd olduğunu, klubun müdafiə hüququnun nəzərə alınmadığını açıqlayıb.
Klub qərara məsul şəxslərlə bağlı araşdırma aparılması üçün Hakimlər və Prokurorlar Şurasına (HSK) şikayət edəcəyini bildirib.
14:51 23.08.2026
Oxunuş sayı: 57
