Birol Akgün: Ahıska türklərinin yaşadığı faciələrin gələcək nəsillərə çatdırılması böyük əhəmiyyət daşıyır
Bakıda Ahıska türklərinin 1944-cü ildə baş vermiş məcburi sürgününün 80-ci ildönümünə həsr olunmuş anım sərgisinin açılışı keçirilib. Azərbaycan Milli Tarix Muzeyində təşkil olunan sərgi Türkiyə Xarici İşlər Nazirliyinin dəstəyi, Dünya Ahıska Türkləri Birliyinin (DATÜB) himayəsi və təşkilatçılığı ilə hazırlanıb.
Məsələ ilə bağlı Crossmedia.az-a açıqlama verən Türkiyənin Azərbaycandakı səfiri Birol Akgün bildirib ki, sərginin hazırlanmasında Azərbaycan Mədəniyyət Nazirliyinin də mühüm dəstəyi olub:
“Bu gün Azərbaycanın Bakı şəhərindəki Milli Tarix Muzeyində Ahıska türklərinin 1944-cü ildə baş vermiş məcburi sürgününün 80-ci ildönümü münasibətilə Türkiyə Xarici İşlər Nazirliyinin dəstəyi, Dünya Ahıska Türkləri Birliyinin himayəsi və təşkilatçılığı ilə kurator Beste Gürsu xanımın hazırladığı anım sərgisinin açılışını keçirdik.
Sərginin hazırlanmasında Azərbaycan Mədəniyyət Nazirliyinin də mühüm dəstəyi olub. Layihəyə dəstək göstərən, onun hazırlanmasında və təşkilində iştirak edən Türkiyədən gəlmiş DATÜB və Xarici İşlər Nazirliyinin nümayəndələrinə, eləcə də Azərbaycanın aidiyyəti qurumlarının nümayəndələrinə təşəkkürümü bildirirəm”.
Səfir qeyd edib ki, Ahıska türklərinin yaşadığı faciənin xatırlanması milli yaddaş baxımından xüsusi əhəmiyyət daşıyır:
“Ahıska türkləri Türk dünyasının ayrılmaz hissəsidir. Dünən olduğu kimi, bu gün də onların yaşadığı faciələrin xatırlanması, milli yaddaşımızın mühüm bir hissəsi kimi sərgi vasitəsilə gələcək nəsillərə çatdırılması böyük əhəmiyyət daşıyır. Çünki xalqların milli yaddaşının formalaşmasında keçmişdə yaşanan hadisələrin mühüm rolu var”.
Birol Akgün vurğulayıb ki, Ahıska türklərinin milli kimliklərini qoruyub saxlaması xüsusi əhəmiyyət daşıyır:
“Türk millətini fərqləndirən əsas xüsusiyyətlərdən biri də bütün çətinliklərə və faciələrə baxmayaraq milli mədəniyyətini, tarixini, kimliyini, dilini və ənənələrini qoruyub saxlamasıdır. Ahıska türklərinin uzun illər ərzində milli kimliyini qoruması, vətən həsrətini yaşatması və öz mədəni dəyərlərinə bağlılığı bu baxımdan xüsusi əhəmiyyət daşıyır”.
Səfir bildirib ki, sürgün Ahıska türklərinin tarixində böyük faciə kimi yadda qalıb:
“Sürgün məcburi yerdəyişmə olmaqla yanaşı, böyük faciə və ağır insanlıq dramıdır. Lakin Ahıska türklərinin bütün bu çətinliklərə baxmayaraq öz milli kimliyini, dilini və ənənələrini qoruması onların dözümlülüyünün göstəricisidir və Türk dünyası üçün böyük mənəvi əhəmiyyət daşıyır”.
Türkiyənin Azərbaycandakı səfiri əlavə edib ki, Türk dünyası Ahıska türklərinə dəstəyini davam etdirməlidir:
“Ahıska türkləri dünən də, bu gün də tək deyillər. Türk dünyası və Türk Dövlətləri Təşkilatı çərçivəsində formalaşan Türk ailəsi onların hüquqlarının, milli kimliyinin və mədəni irsinin qorunmasına bundan sonra da dəstək verməlidir”.
Nigar Xəlilli
16:18 21.08.2026
Oxunuş sayı: 54
