Özbəkistanla Azərbaycan arasında ticarət dövriyyəsinin artırılması müzakirə olunub
Özbəkistanın investisiya, sənaye və ticarət naziri Laziz Kudratov Azərbaycan səfiri Rəşad Məmmədovla görüşüb.
Crossmedia.az xəbər verir ki, Özbəkistanın İnvestisiya Nazirliyinin mətbuat xidmətinə istinadən məlumatına görə, tərəflər ikitərəfli ticarət və investisiya əməkdaşlığının dinamikasını müzakirə ediblər.
"Əldə edilmiş razılaşmaların həyata keçirilməsi üçün "Yol xəritəsi" və qarşılıqlı ticarət dövriyyəsinin 2030-cu ilə qədər 1 milyard dollara çatdırılması proqramı da daxil olmaqla, ticarət və investisiya əməkdaşlığının daha da genişləndirilməsinə yönəlmiş ikitərəfli sənədlərin hazırlanmasına xüsusi diqqət yetirilib", - bəyanatda deyilir.
Özbəkistan tərəfinin məlumatına görə, ölkələr arasında ticarət dövriyyəsi 2025-ci ildə 307,3 milyon dollara (artım 14,6 %), 2026-cı ilin yanvar-iyun aylarında isə 170,3 milyon dollara (artım 30,8 %) çatıb. Görüşdə həmçinin 22 avqustda Daşkənddə keçiriləcək və iki ölkənin regionları, müəssisələri arasında birbaşa əlaqələrin genişləndirilməsi üçün platforma rolunu oynayacaq IV Özbəkistan-Azərbaycan Regionlararası Forumunun təşkilati məsələləri də müzakirə olunub.
Görüşün yekununa əsasən ticarət dövriyyəsinin artırılması, investisiya layihələrinin təşviqi və regionlararası əlaqələrin inkişaf etdirilməsi üçün gələcək addımlar müəyyənləşdirilib.
23:02 19.08.2026
Oxunuş sayı: 59
