Hulusi Kılıç: “Rusiya tezliklə Azərbaycan xalqından üzr istəməlidir”
Dekabrın 25-də AZAL-a məxsus J2-8243 nömrəli Bakı-Qroznı reysini yerinə yetirən “Embraer 190” təyyarəsi Aktau şəhərinin yaxınlığında qəzaya uğrayıb.
Hadisə zamanı təyyarədə beş ekipaj üzvü olmaqla ümumilikdə 67 nəfər (37 Azərbaycan, 16 Rusiya, altı Qazaxıstan və üç Qırğızıstan vətəndaşı) olub.
Faciəvi təyyarə qəzasında 38 nəfər həlak olub, 29 nəfər isə xəsarət alıb.
Ötən gün "Euronews" Azərbaycan hakimiyyət orqanlarındakı mənbəyə istinadən təyyarənin Rusiyaya məxsus raketlə vurulduğunu qeyd edib.
Eyni zamanda, aparıcı xarici media orqanları ciddi iddialar yayıb. Bu iddialarda da baş vermiş qəzanın səbəb kimi Rusiyaya məxsus “Pantsir-S” raketi göstərilib. Bu isə Beynəlxalq Konvensiyanın tələblərinin pozulması deməkdir.
Türkiyənin Azərbaycandakı keçmiş səfiri, tanınmış diplomat Hulusi Kılıç Gununsesi.info-ya təyyarə qəzası ilə bağlı vəziyyəti şərh edib.
Hadisəni qətiyyətlə qınayan diplomat bunun utancverici olduğunu bildirib:
“Bakı-Qroznı marşrutu üzrə hərəkət edən “Azərbaycan Hava Yolları”na məxsus sərnişin təyyarəsinin Rusiyanın “Pantsir-S” hava hücumundan müdafiə (HHM) sistemi tərəfindən vurulması insanlıq üçün faciədir. Mən bu hadisəni qətiyyətlə qınayıram. Bildiyimiz kimi, Rusiya tərəfindən raketlə vurulan təyyarənin Aktau şəhərinə eniş etmək məcburiyyətində qalması nəticəsində 38 nəfər həyatını itirib, çox sayda insan yaralanıb. Əldə olunan məlumatlar göstərir ki, pilota eniş icazəsi verilməsə də, o, peşəkar məharətlə təyyarəni Aktau şəhərinə endirə bilib. Pilotun göstərdiyi bu fədakarlığı sayəsində də çox insanın həyatı xilas olunub. Onu da vurğulamaq istəyirəm ki, təyyarənin yaşayış məntəqəsinə düşməməsi də bu fəlakəti azaldıb. Həyatını itirənlərin ailələrinə, yaxınlarına həmçinin Azərbaycan və Qazaxıstan xalqlarına başsağlığı verirəm. Millətimizin başı sağ olsun”.
H.Kılıçın fikrincə, bu gün real faktlar bir daha onu göstərir ki, təyyarə Rusiya ərazisi üzərində olarkən raket ilə vurulub:
“Kanada-Montrealda yerləşən Beynəlxalq Mülki Aviasiya Təşkilatında 4 ildən artıq çalışdığım üçün aviasiya qanunvericiliyinə aid bilgilərim var. Bütün hallarda mülki hava gəmilərinin mühafizə etmək hər ölkənin borcudur. Mülki təyyarələrə hücum edilə bilməz. Hesab edirəm ki, prezident Putinin təyyarənin qəzaya uğramamasından xəbəri olmayıb. Bu gün Rusiya hakimiyyəti dərhal üzr istəməli, bəyanat yaymalı və zərərçəkmişlərin ailələrinə də təzminat ödənilməlidir. Bu vəziyyətə tez bir zamanda aydınlıq gətirilməlidir”, – deyə diplomat əlavə edib.
Türkiyə xalqının böyük kədər içində olduğunu deyən keçmiş səfir Türkiyənin daima Azərbaycan xalqının yanında olduğunu da vurğulayıb:
“Bu hadisəyə görə böyük kədər yaşadıq. Atatürkün dediyi kimi, “Azərbaycanın sevinci sevincimiz, kədəri isə kədərimizdir. Azərbaycan Prezidentinin sammitə getməzdən əvvəl hadisədən xəbər tutması və sonra onu izləmək üçün geri qayıtması böyük liderliyinin əlamətidir. Azərbaycan xalqı dərhal bütün zərərçəkmişlərə qayğı göstərib, onların Azərbaycana gətirilməsini təmin edib. Ağrımız, yaramız böyükdür. Mən bu faciəni şiddətlə qınayıram. Hamı kimi mən də Rusiyanın tezliklə Azərbaycan xalqından üzr istəməsini, məsul şəxslərin cəzalanmasını səbirsizliklə gözləyirəm”, – deyə H.Kılıç fikirlərini yekunlaşdırıb.
16:12 27.12.2024
Oxunuş sayı: 10980
