Aİ plastik tullantılarının üçdə birini Türkiyəyə göndərir
Avropa İttifaqı (Aİ) ölkələri plastik tullantılarının əhəmiyyətli hissəsini ixrac etməyə davam edir və bu sahədə əsas ünvanlardan biri Türkiyə olaraq qalır.
Crossmedia.az xəbər verir ki, "Yeni Şafak" bu barədə məlumat yayıb.
Məlumata görə, Aİ ölkələri plastik tullantılarının 30 faizdən çoxunu Türkiyəyə ixrac edir ki, bu da təxminən 45 min 923 ton plastik tullantıya bərabərdir.
Bildirilir ki, 2024-cü ildə Türkiyə Aİ-dən ən çox tullantı qəbul edən ölkələr sırasında yer alıb. 2023-cü ildə 314 min ton olan plastik tullantı idxalı bir il ərzində 425 min tona yüksələrək təxminən 35 faiz artıb.
Nəşrin yazdığına görə, Türkiyəyə ən çox plastik tullantı göndərən ölkə Böyük Britaniyadır. 2023-cü ildə Böyük Britaniya Türkiyəyə 140 min 907 ton, Almaniya isə 87 min 109 ton plastik tullantı ixrac edib.
Türkiyədə 2024-cü ildə qüvvəyə minən “Tullantı İdxalı Tətbiqləri üzrə Ümumi Təlimat” çərçivəsində qırıntı, toz, pulcuq və digər formada olan plastik tullantıların idxalına qadağa tətbiq olunub.
Mütəxəssislərin fikrincə, Avropada tullantıların emal xərclərinin artması səbəbindən Aİ ölkələri bu məsuliyyəti daha çox Türkiyə kimi ölkələrə yönəldir. Bununla yanaşı, metal tullantıları Türkiyə sənayesində xammal kimi istifadə olunsa da, plastik tullantıların eyni iqtisadi dəyərə malik olmadığı vurğulanır.
13:12 23.07.2026
Oxunuş sayı: 36
