Bakının bu ərazilərində kirayə qiymətləri ucuzlaşacaq
Bakıda kirayə mənzillərin qiymətləri yüksək olaraq qalır və bazarda bahalaşma tendensiyası davam edir. Azərbaycan Mərkəzi Bankının məlumatına görə, 2026-cı ilin iyununda ölkə üzrə kirayə qiymətləri illik müqayisədə 7,4 faiz artıb. Avqustda isə Bakıda yeni tikili mənzillərin median aylıq kirayə haqqı 950 manata çatıb. Ekspertlər yüksək kirayə qiymətlərinin əsas səbəbləri arasında mənzil almağın bahalaşması, tələbin artması, mərkəzə və iş yerlərinə yaxın ərazilərdə təklifin məhdudluğu, həmçinin daşınmaz əmlakın investisiya baxımından cəlbediciliyini göstərirlər. Mənzil almaq imkanının azalması daha çox insanı kirayə bazarına yönəldir və bu da tələb-təklif balansına əlavə təzyiq yaradır.
Əmlak eksperti Ramil Osmanlı kirayə mənzil bazarında qiymətlərin artmasının və ucuzlaşmamasının əsas səbəbinin tələb və təklif nisbəti ilə bağlı olduğunu Crossmedia.az-a açıqlamasında bildirib: “Tələb yüksəkdir, təklif aşağıdır. Xüsusilə ucuz və orta qiymət təklifləri üzrə mənzil fondunun sürətlə məhdudlaşması meyli gedir. Şəhərsalma prosesi sürətləndikcə köhnə yaşayış fondları azalır. Köhnə yaşayış fondları azaldıqca da onun yerində daha yeni və bahalı mənzil fondu meydana gəlir. Buna görə də bazarda biz davamlı qiymət artımlarını müşahidə edirik”.
Ekspertin sözlərinə görə, təklif aşağı olduğu müddətdə kirayə mənzil bazarında ucuzlaşma gözləmək çətindir: “Bu gün tələbələr bazara müraciət edirlər, faktiki olaraq mənzil tapmaqda problem yaşayırlar. Müşahidələr göstərir ki, artıq bir neçə ildir davam edən meyl hələ müəyyən bir müddət, yəni uzunmüddətli perspektivdə yalnız artan xətt üzrə davam edəcək. Şəhərsalma prosesi davam edəcək, bahalı mənzillər artacaq, köhnə yaşayış fondları sıradan çıxacaq və bu, təbii ki, qiymətlərin artımına təsir göstərəcək”.
R.Osmanlı bildirib ki, kirayə bazarında qiymətlərin stabilləşməsi üçün iki əsas istiqamət üzrə addımlar atılmalıdır: “Birinci yol regionların iqtisadi inkişafıdır. Regionlarda yeni iş yerləri yaradılmalı, iqtisadiyyatın şaxələndirilməsi istiqamətində ciddi islahatlar aparılmalıdır. Regionlarda iqtisadi fəallıq artırılmalıdır. Bu yolla Bakıdan regionlara axını təmin etməklə tələbi azalda və bazardakı qiyməti tənzimləyə, stabilləşdirə bilərik. İkinci yol isə alternativ məhsul növlərinin bazarda bolluğunun yaradılmasıdır. Sahibkarlar yataqxana tipli, xüsusilə Türkiyənin təcrübəsindən istifadə edilməklə oxşar alternativ yaşayış fondları yaratmalı və bu sahəyə təşviq prosesində müəyyən güzəştlər təqdim olunmalıdır. Yalnız bu iki variantdan sonra kirayə mənzil bazarında qiymətlərin stabilləşməsini, tələb və təklifdən asılı olaraq hətta ucuzlaşmasını müşahidə edə bilərik. Əks təqdirdə, hesab edirəm ki, bunu gözləmək yersiz olardı”.
Nigar Xəlilli
19:00 10.09.2026
Oxunuş sayı: 52
