Dünyada ürək-damar cərrahiyyəsi üzrə olan bütün yeniliklər ölkəmizdə tətbiq olunur
Dünyada olduğu kimi Azərbaycanda da ürək-damar xəstəlikləri gənc və yaşlıların invalizasiya və ölüm faktorları arasında birinci yer tutmaqdadır. Təəssüf ki, proses davam edir və xəstə sayı getdikcə artır.
Crossmedia.az xəbər verir ki, bunu jurnalistlərə açıqlamasında Azərbaycan Ürək və Damar Cərrahiyyəsi Cəmiyyətinin sədri Ramil Əliyev deyib.
R.Əliyevin sözlərinə görə, Azərbaycan Ürək və Damar Cərrahiyyəsi Cəmiyyəti qurulduğu gündən etibarən 20 il ərzində ölkə səhiyyəsinə çox böyük töhfə verib. Cəmiyyət istər səhiyyə sisteminin sertifikasiyasının standartlaşdırılması, istərsə də bilik-praktik fəaliyyətlərin birləşdirilməsi istiqamətində fəaliyyət göstərir: "İyirmi il ərzində 8 dəfə Bakı Ürək Günləri, beynəlxalq konfranslar keçirilib. Həmçinin aylıq toplantılar təşkil olunur. Bunlar da gənc həkimlərin inkişafına, bilik səviyyəsinin artırılmasına yönəlib. Azərbaycanda ürək-damar cərrahiyyəsinin səviyyəsi getdikcə artır. Hazırkı vəziyyətdə əvvəllər olduğu kimi xəstələrin xarici ölkələrə getməsinə və şəfanı orada aramasına ehtiyac yoxdur. Tamamilə bütün spektr xəstəlik müalicəsi Azərbaycanda icra olunur. Çox sevindiricidir ki, son illərdə icbari tibbi sığorta sistemi səhiyyədə yer aldıqdan sonra xəstələr həmin xidmətdən tam təmənnasız faydalana bilirlər. Hazırda dünyada ürək-damar cərrahiyyəsi üzrə bütün yeniliklər Azərbaycanda tətbiq olunmaqdadır”.
18:10 23.12.2024
Oxunuş sayı: 21312
