NATO-nun kəşfiyyat təyyarəsi Qara dənizdə müşahidə aparır
NATO-ya məxsus Boeing E-3A Sentry uzaqmənzilli radiolokasiya aşkarlama və idarəetmə təyyarəsi Qara dəniz sahilləri yaxınlığında patrul uçuşu həyata keçirir.
Crossmedia.az xəbər verir ki, bu barədə TASS Avropa İttifaqının hava hərəkətinə nəzarət xidmətlərindəki mənbəyə istinadən məlumat yayıb.
Məlumata görə, Lüksemburqda qeydiyyatdan keçmiş təyyarə hazırda Rumıniyanın Qara dəniz sahilləri yaxınlığındakı hava məkanında dövrə vurur. Bildirilir ki, hava gəmisi Litvadan havaya qalxdıqdan sonra əvvəlcə Rumıniyanın mərkəzi hissəsi üzərində bir neçə dövrə vurub, daha sonra isə sahil istiqamətinə hərəkət edib.
Mənbənin sözlərinə görə, E-3A Sentry təyyarəsinin radiolokasiya sistemi təxminən 400 kilometr radiusunda hava hədəflərini aşkar etmək imkanına malikdir.
Xatırladaq ki, son günlər NATO-nun kəşfiyyat və müşahidə təyyarələrinin Rusiya sərhədlərinə yaxın ərazilərdə uçuşları intensivləşib. İyulun 7-də Bombardier Challenger 650 Artemis II kəşfiyyat təyyarəsinin Kalininqrad vilayəti ətrafında, iyulun 6-da isə Baltikyanı ölkələr üzərindən Rusiya sərhədi yaxınlığında uçuşlar həyata keçirdiyi bildirilmişdi.
09:52 12.07.2026
Oxunuş sayı: 56
